Zechariah 12

Tsonga Xitsonga (Bibele) 1929

← Chapter 11 Jump to: Chapter 13 →

1Vuprofeta bya rito ra Yehovha ehenhla ka Israele: Ku vurile Yehovha la andlaleke matilo, la vangeke misava, la vumbeke moya wa munhu eka yena:

2“Vonani, ndzi ta endla ha Yerusalema, xinwelo xa sululwana eka matiko hinkwawo ya matlhelo, ni ka Yuda swi va tano, loko ku sivelelwa Yerusalema.

3Kambe hi siku rolero, ndzi ta endla ha Yerusalema ribye lero tika eka matiko hinkwawo; hinkwavo lava ri tlakulaka va ta vavisiwa, kutani matiko hinkwawo ya misava ma ta ri rhendzela.

4Hi siku rolero, ku vula Yehovha, ndzi ta ba tihanci hinkwato hi ntshuko, ni vakhandziyi hi vuhlanyi; ndzi ta languta hi mahlo ya mina yindlu ya Yuda, tihanci hinkwato ta matiko ndzi ta ti ba hi ku ti swihata mahlo.

5Tihosana ta Yuda ti ta ku etimbilwini ta tona: ‘Vaaki va Yerusalema, i matimba ya hina, ha Yehovha wa tinyimpi, Xikwembu xa vona.’

6“Hi siku rolero ndzi ta endla tihosana ta Yuda ti va kukota xitiko xa ndzilo exikarhi ka tihunyi, ni xisana xa ndzilo exikarhi ka tinyandza, ti ta dya exineneni ni le ximatsini matiko hinkwawo ya le matlhelweni; loko a ri Yerusalema, u ta tshama exiteni xa yena eYerusalema.

7Yehovha u ta hlayisa matende ya Yuda eku sunguleni, leswaku ku kwetsima ka yindlu ya Davhida, ni ku kwetsima ka vaaki va Yerusalema, ku nga tshuki ku tlakukela Yuda.

8“Hi siku rolero Yehovha u ta sirhela vaaki va Yerusalema; loko a ri loyi a nga riki na matimba exikarhi ka vona, esikwini rolero, u ta kotisa Davhida; yindlu ya Davhida vi va kukota Xikwembu, kukota ntsumi ya Yehovha emahlweni ka vona.

9“Hi siku rero ndzi ta tiyisela ku lovisa matiko hinkwawo lama hlaselaka Yerusalema.

10Ndzi ta chela ehenhla ka yindlu ya Yuda ni le henhla ka vaaki va Yerusalema, moya wa tintswalo ni wa mikhongelo; kutani va ta languta eka mina loyi va n'wi tlhaveke. Va ta n'wi rilela kukota loko va rilela n'wana la nga tswariwa a ri yexe va hlomuka ngopfu ehenhla ka yena, kukotisa loko va hlomukela n'wana wa mativula.

11“Esikwini rolero, xirilo xi ta va lexikulu eYerusalema, xi kota xirilo xa Hadada-Rimoni enkoveni wa Megido.

12Misava yi ta rila, ku rila tinxaka hinkwato ha rin'werin'we: Rixaka ra yindlu ya Davhida hitlhelo, ni vasati va kona hitlhelo; rixaka ra yindlu ya Natani hitlhelo, ni vasati va kona hitlhelo;

13rixaka ra yindlu ya Levhi hitlhelo, ni vasati va kona hitlhelo; rixaka ra Ximeyi hitlhelo, ni vasati va kona hitlhelo;

14ni loko ku ri etinxakeni tin'wana hinkwato, rixaka rin'wana ni rin'wana hitlhelo, ni vasati va kona hitlhelo.

← Chapter 11 Jump to: Chapter 13 →