Zechariah 5

Tsonga Xitsonga (Bibele) 1929

← Chapter 4 Jump to: Chapter 6 →

1Ndzi engeta ndzi tlakusa mahlo, ndzi languta, loko kan'we ku humelela papila leri nga phurumulwa, leri hahaka.

2Kutani ntsumi yi ku eka mina: “U vona yini?” Ndzi ku: “Ndzi vona papila leri nga phurumulwa, leri hahaka, leri ku leha ka rona ku nga ka swisungunhu swa makumu mambirhi, ni ku anama ka rona swisungunhu swa khume.”

3Yi ku eka mina: “Rona i ndzhukano lowutaka ehenhla ka misava, hikuva un'wana ni un'wana la yivaka u ta lovisiwa hi timhaka ta rona leti tsariweke tlhelo rin'wana ra rona, un'wana ni un'wana la hlambanyaka u ta lovisiwa hi timhaka ta rona leti nga tlhelo rin'wana.

4Ndzi wu humesile, ku vula Yehovha wa tinyimpi, wu ta nghena endlwini ya khamba ni le ndlwini ya la hlambanyaka hi vito ra mina hi mavunwa; wu ta tshama exikarhi ka yindlu ya yena, wu ta yi herisa, ni timhandze ta yona, ni maribye ya yona.”

5Ntsumi leyi ngi yi vulavula na mina, yi engeta yi humelela, yi ku eka mina: “Tlakusa mahlo ya wena, u vona lexi humelelaka lahaya leswaku swini.”

6Ndzi ku: “Xini?” Kutani yi ku: “I efa leyi humelelaka.” Yi engeta, yi ku: “Hi xona xifaniso xa vona hinkwako emisaveni.”

7Kutani vonani, ku yimisiwa xifunengeto xa ntsopfu, kutani ku humelela wansati la tshameke endzeni ka efa.

8Kutani yi ku: “Loyi i vudyohi!” Kutani yi n'wi hoxa endzeni ka efa, yi hoxa ni xifunengeto lexo tika xa ntsopfu ehenhla ka nomu wa yona.

9Kutani ndzi tlakusa mahlo ya mina ndzi languta, kutani vonani, ku humelela vavasati vambirhi, etimpapeni ta vona a ku ri ni moya, tona timpapa ti kotisa timpapa ta ntsavila; va tlakusela efa exikarhi ka misava ni tilo.

10Ndzi ku eka ntsumi leyi vulavulaka na mina: “Volavo va yisa efa kwihi?”

11Yi ku eka mina: “Va yi yisa etikweni ra Xinara ku yi akela yindlu kona, yi ta vekiwa kona; yona yindlu yi ta tiyisiwa ehenhla ka vutshamo bya yona.”

← Chapter 4 Jump to: Chapter 6 →