Lamentations 1

Tatar Crimean 2016 Bible - Къырымтатарджа [Crimean Tatar] (Мукъаддес Китап)

Jump to: Chapter 2 →

1Инсан толу олгъан шеэр бир озю къалды; халкълар арасында буюк олгъан шеэр тул къадын киби олды; виляетлер арасындаки башлыкъ къулгъа чевирильди.

2Геджелери аджджы-аджджы агълай, янакъларында козьяшы; оны севгенлернинъ арасында гонъюль аладжакъ сою ёкъ; достлары эписи онъа хаинлик этип, душмангъа чевирильди.

3Ехуда беля ве агъыр къуллукъ ичинде сюргюнликке огърады; халкълар арасында отура, раатлыкъ ерини тапамай; сыкъынты вакътында оны къувалагъанлар артына етти.

4Сион ёллары агълайлар, чюнки байрамгъа кеткенлер ёкъ; эписи къапулары янларында ич ким къалмады, руханийлери ич чекелер; къызлары гъам-къасевет чекелер, озю де аджджы алда.

5Оны чекиштиргенлер башлыкъларына чевирильди, душманлары раат олды; яман япкъанлары чокъ олгъаны ичюн, РАББИ башына беля тюшюрди; душманларынынъ огюнде балалары сюргюнлик этильди.

6Сион къызынынъ бутюн гузеллиги учып кетти, башлыкълары отлакъ тапамагъан сыгъынлар киби олды; такъаттан кесилип, къувалагъанларынынъ огюнде кеттилер.

7Ерусалим беля вакътында, азап чеккен куньлеринде эвель куньлериндеки байлыгъыны хатырлады; лякин душманлар халкъны енъдилер, халкъкъа кимсе ярдым этмеди; душманлар шеэрге бакъалар, харап олгъанындан кулелер.

8Ерусалим буюк гуна япты, онынъ ичюн арам олды; оны шуретлеген эр кес, айыбыны корип, энди оны мыскъыллайлар; шеэр озю де ич чекип, юзюни чевире.

9Этегинде арамлыкъ бар эди, амма не оладжагъыны тюшюнмеди; башкъаларны шашырып, пек ашаланды, гонъюль аладжакъ кимсеси де ёкъ эди. «Я РАББИ! Беляма бакъ! Душманым кучьлю олды!»

10Душман энъ къыйметли шейлерине къолуны узатты; О, коре ки, Мукъаддес Ерине миллетлер кирелер; Сен исе, я Рабби, Сенинъ джемаатынъда олмагъа оларгъа разылыкъ бермединъ.

11Бутюн халкъы отьмек къыдырып, ич чекелер; джаныны къуртармакъ ичюн, ашкъа къыйметли шейлерини берелер. «Я РАББИ, корь мени, не къадар ашалангъаныма бакъ».

12Эй, сизлер, ёлдан кечкенлер! Башларынъызгъа бу тюшмесин! Бакъынъыз да корюнъиз, хасталыгъыма ошагъан хасталыкъ бармы? Бу хасталыкъны РАББИ башыма гъазабы алевленген куню ёллады!

13Кемиклериме атешни юксекликтен ёллады, бутюн беденимни къаплады; аякъларыма къапкъан къойды, мени къачмагъа меджбур этти; мени бакъымсыз этти, эр бир кунь хаста олам.

14Рабби Озь къолунен яманлыкъларымны боюндырыкъ киби, бойнума багълады; бири-бирине багъланып, бойнума асалар; Рабби такъатымны алды, ойле адамларнынъ къолуна берди ки, оларны енъип оламайым!

15Меним эписи кучьлю адамларымны Рабби ёкъ этти; йигитлеримни йыкъмакъ ичюн, манъа къаршы чокъ адамны топлады; юзюмни баскъаны киби, Рабби Ехуда къызыны таптады.

16Бунынъ ичюн агълайым, козьяшларымны тёкем; мени джанландыраджакъ бири, меним гонъюль алыджым узакъ; балаларым ольдюрилелер, душманларым енъелер.

17Сион къолларыны узата, амма гонълюни аладжакъ ёкъ. РАББИ буюрды, ве душманлар Якъупны алкъагъа алды; Ерусалим араларында арам олды.

18РАББИ адалетлидир, мен сёзюне бойсунмадым. Эй, бутюн халкълар! Динъленъиз, меним азапларыма бакъынъыз; къызларымнен огъланларым эсирликке кетелер.

19Достларымны чагъырам, амма олар мени алдатты; руханийлеримнен акъсакъалларым шеэрлерде гъайып олалар, джанларыны къуртармакъ ичюн аш къыдыралар.

20Бакъ, я РАББИ, мен ярамайым; ичим-багърым тарсыкъа, юрегим яна; инатлыкънен Санъа къаршы чыкътым, шимди исе тышарыда къылыч балаларны кесе, эвимде олюм мени беклей.

21Ич чеккенимни эшиттилер, амма гонъюль алыджым ёкъ; эписи душманларым белягъа огърагъанымны эшиттилер, буны манъа Сен япкъанынъа къувандылар. Сен эвельден айткъан кунь кельди, олар да мен киби олгъайды!

22Яманлыкъларынынъ эписини корь; акъсыз япкъанларым ичюн манъа бутюн эткенлеринъни оларгъа да яп. Инъильтилерим артыкъ агъыр, юрегим де такъаттан кесиле.

Jump to: Chapter 2 →