2 Corinthians 12

Umbundu Bible (Embimbiliya - Bíblia Sagrada em Umbundu)

← Chapter 11 Jump to: Chapter 13 →

1Ndaño ka ci silivila oku lipanda haimo ndi lipanda ño. Ngamako oku lombolola awima lasituluilo a tunda ku Ñala.

2Nda kũlĩha omunu umue vu Kristu, okuti konyima yekui lakuãla kalima, omunu waco wa yenjekiwa toke kilu liatatu. Nda letimba, nda ha letimbako si ci, Suku o ci.

3Nda kũlĩha okuti omunu waco wa yenjekiwa toke vimbo lia Suku, nda letimba nda haletimbako si ci, Suku o ci.

4Eye wa yeva olondaka ka vi popaiwa, okuti omunu oku vi popia ci kola.

5Omunu ndo-o, eye ndi lipandela, puãi ame muẽle si lipandi, te oku lipandela okupekengua kuange.

6Momo, ndaño njongola oku lipanda, haimo si lingi eveke, momo mopia ocili. Puãi si ci lingi sanga umue o simila ca piãla eci a muila, pamue ceci a njevela.

7Oco nda kapiwila osongo vetimba okuti si litambelela asituluilo aco a piãla. Osongo yaco oyo omunga ya Satana yi mbeta mbeta okuti si litambela enene.

8Osongo yaco, nda yi likutililila olonjanja vitatu ku Ñala okuti yi nunda.

9Eye puãi wa ñumbulula hati, Ocali cange cu ku tẽla, momo unene wange u loñolohela poku pekengua. Oco sole cimue oku lipandela okupekengua kuange okuti unene wa Kristu u mbuila.

10Oco, mekonda lia Kristu, sanjukila oku pekengua, lafuki, lovosuke, lakangiso, lasakalalo, momo, eci nda pekengua, oco ñuete ongusu.

11Nda linga eveke. Ene wa ci ndingisi, omo nda sesamelele oku sivayiwa lene. Momo, ndaño sicimueko, haimo si sule okuti ovapostolo vana va kemala va mbelapo.

12Olondimbukiso viupostolo wocili via lingiwa pokati kene lepandi liosi. Via lingiwa lovilimbu, lovikomo, lovopange anene.

13Momo pokati kakongelo osi, ene hẽ, wa kuatisiwi ndati ci sule, okuti akuavo ca velapo? Cimosi lika okuti, ame muẽle sio sakalaisaili oku nekula. Ngeceli ekandu liaco!

14Cilo, yilo onjanja yatatu ñasi loku iya kokuene. Kuenje siu sakalaisi loku ñuatisa omo si sandi cene, te ene muẽle ndu sandi. Momo omãla ka va sesamela oku siliyila olonjali viavo, te olonjali ovio vi siliyila omãla.

15Ame, cosi cange oku ci pesila ovilelembia viene, ndaño ame muẽle oku vi fila, esanju. Nda ndu soli ca lua, ame muẽle soliwa citito ale?

16Puãi, ndaño sio sakalaisaili oku nekula, haimo nda kala lelimbi yu ndo pundi latutu?

17Pokati kava nda tumile kokuene pa kala hẽ umue wa nambuila cimue uyombeki?

18Nda katula Tito kuenje ndo tuma lomue ukuetu. Tito hẽ, wo li? Ame la Tito, utima wetu, homuamueko? Ovituwa vietu, havimuamueko?

19Ene hẽ, vu sima sima okuti tu kasi loku liyowisa kokuene? Akuetu wa soliwi, cosi tu popia tu ci popela vu Kristu kovaso a Suku, kuenje tu ci popela oku vu kolisa.

20Momo ñasi lohele sanga eci njiya siu sangi ndeci ndu yonguili, kuenda ame kokuene si kala ndeci ene vu njonguila. Ñuetevo ohele sanga ku kala olonjaya, lonya, lovikumbiti, lolonepele, lolombonde, loku sokola, loku lenda kutima, lovama.

21Ñasivo lohele yokuti, eci njiya vali, Suku yange o sepuisila kovaso ene, okuti ndi lilila va lua va lueya ale, kuenje haivo ka va likekembelele evĩho lukahonga lupuepue va lingainga.

← Chapter 11 Jump to: Chapter 13 →