2 Corinthians 5

Umbundu Bible (Embimbiliya - Bíblia Sagrada em Umbundu)

← Chapter 4 Jump to: Chapter 6 →

1Momo tu ci okuti etimba lietu lia soka ndosinge, nda li nyõleha, kilu tu kuete onjo ya tungiwa la Suku, okuti ka ya tungiwile lovaka, kuenje yenda hũ ka yi pui.

2Momo mulo tu leña leña, tu livela oku wala onjo yetu yokilu,

3ndokuti poku yi wala, ka tu kala vali epõlõla.

4Momo, osimbu tu kasi vosinge, tu leña leña momo tua lemẽlẽlua. Ka ci kasi okuti tu livela oku luliwa etimba. Eci tu livela ceci, oku walisua uwalo ukuavo, okuti eci ci fa fa ci taka vomuenyo.

5U wa tu cangiliyila, Suku, haeye wa tu iha onjeke y'Espiritu.

6Oco tu kasilili ño-o lutõi. Tua kũlĩha okuti osimbu tu kasi vetimba tu kasi ocivanja la Ñala.

7Momo tu enda enda lekolelo, ha loku kolelako ovaso.

8Tu kasi lutõi, kuenje kokuetu, ca velapo oku tunda vetimba loku ilukila ku Ñala.

9Oco, kuosi tu kasi, ci kale vetimba, ci kale pi, tu likapela oku u sanjuisa.

10Momo vosi tu laika oku iya kekanga lia Kristu ha tu tambula eci ca sesamela ovilinga vietu, ci kale ciwa, ci kale cĩvi, okuti omunu omunu o tambula ndovilinga viaye vina a linga osimbu a kala vetimba.

11Oco, omo tua kũlĩha oku sumbila Ñala, oco tu peya omanu. Puãi, ndomo tua tuwa ocili mua kũlĩhiwa la Suku, kuenje ndavoka okuti mua kũlĩhiwavo lovitima viene.

12Ka tu kasi loku lisivaya vali kokuene, te oku wihi evelo lioku tu kuatela olopandu okuti vu tẽla oku kumbulula ava va lipandiyila evi vi moleha viomunu, viovutima waye havioko.

13Momo nda tua linga ayui, tua ci lingila Suku, nda tua linga vakualondunge tuo ci lingili ene.

14Momo ocisola ca Kristu oco ci tu vetiya, omo tua kolela okuti umuamue wa fila vosi; oco vosi va fa.

15Kuenje eye wa fila vosi okuti, ava va kasi lomuenyo ka va kasilili lawo ovo muẽle, te oku vumba u wa va fila haeye wa va pinduiwila.

16Kaliye, ka tu limbuka vali omunu ukuetimba ndeci a limbukiwa ño voluali lulo. Ndaño tua limbukile Kristu ndomunu ukuetimba voluali lulo, haimo, tunde opo, ka tu u sokoluila vali ndoco.

17Oco, nda umue o kasi vu Kristu, wa linga ociluvo cokaliye. Cosi cale ca pita, kuenje cosi ca linga cokaliye.

18Cosi eci ci tunda ku Suku u wa tu inalisa kokuaye la Mitakati Yesu Kristu, kuenje wa tu kundika upange woku inalisa.

19Ca lomboloka okuti, vu Kristu, Suku wa kala loku inalisa oluali kokuaye, okuti ka tendele vali akandu omanu oku va pisa lao, kuenje wa tu kundika upange woku inalisa.

20Oco tua linga olomunga via Kristu, okuti elaleko lia Suku li pitiyiwa letu. Vonduko ya Kristu tu vu peya tuti, Linali la Suku.

21Una ka kũlĩhile ekandu Suku wo linga ekandu mekonda lietu, okuti vokuaye tu lingiwa esunga lia Suku.

← Chapter 4 Jump to: Chapter 6 →