2 Thessalonians 1

Umbundu Bible (Embimbiliya - Bíblia Sagrada em Umbundu)

Jump to: Chapter 2 →

1Ame ndi Paulu, la Siluano, kuenda Timoteo, Tu sonehela ekongelo lia va Tesalonike li kasi vu Suku Isietu kuenda vu Ñala yetu Yesu Kristu.

2Ocali lombembua vi tunda ku Suku Isia, kuenda ku Ñala Yesu Kristu vi kale lene.

3A vamanji, ca tu sesamela oku vu panduila ku Suku olonjanja viosi ndeci ca sunguluka, momo ekolelo liene li kasi loku amako oku lua, ndaño ocisola cene coku lisola pokati lacovo.

4Oco, vakongelo a Suku, tu vu pandiyila epandi lekolelo vu kasi lalio pokati kafuki ene osi, lohali vu kasi loku tala tala.

5Eci cosi ca linga ondimbukiso yokutetulula kua Suku kuesunga. Suku wa panga okuti ene vu sesamisua usoma wa Suku, una vu kasi loku u talela ohali.

6Momo, ku Suku, esunga oku fetuluinya lohali ava vo talisi ohali,

7loku eca kokuene vu kasi loku talisua ohali, epuyuko kumue letu, eci Ñala Yesu a ka tukuluka tunde kilu lovangelo vaye va pama vondalu yulienge,

8kuenje o fetuluinya ava ka va kũlĩhile Suku, lava ka va tava kondaka yiwa ya Ñala yetu Yesu.

9Ovo va mola eyambulo liokunyõleha ka ku pui, loku tundisua ku Ñala lo kulamba wunene waye.

10Va li mola eteke Yesu iya ha muisua ulamba lolosandu viaye, loku komohiwa lava vosi va tava, momo owanji wetu wo kokuene wa kolelua.

11Oco tu vu likutililila olonjanja viosi okuti, vu tendiwa la Suku yetu ndava va posokela okulalekiwa kuavo. Tu likutililavo okuti Suku o lemuluisa onjongole yosi yesunga, kuenda upange wosi wekolelo u lingiwa lunene waye.

12O ci lingila okuti onduko ya Ñala yetu Yesu Kristu yi muila ulamba kokuene, lene vu muila ulamba kokuaye, ndocali ca Suku yetu leci ca Ñala Yesu Kristu.

Jump to: Chapter 2 →