2 Thessalonians 2

Umbundu Bible (Embimbiliya - Bíblia Sagrada em Umbundu)

← Chapter 1 Jump to: Chapter 3 →

1Kaliye, a vamanji, kondaka yetukuluko lia Ñala yetu Yesu Kristu lokuliongoluila kuetu kokuaye, tu vu vetiya okuti,

2ka vu tatamisua lombili vovitima, pamue oku yokokisua, ndaño locitumasuku, ndaño londaka, ndaño lukanda ndu wa tunda kokuetu oku sapula okuti eteke lia Ñala li kasi ocipepi.

3Lomue ka ko kembi, momo eteke liaco ka liya te tete olukonyo lueya, kuenje omunu wekandu o tukuluka, eye omõla enyõleho,

4una o patãla, kuenje o lipiãlisa kovina viosi vi tukuiwa olosuku, levi vi fendalaiwa, okuti eye o tumala vonembele ya Suku oku litukola hati, Ame Suku.

5Ka wa ivalukili okuti, eci nda kala lene ndo sapuilili ovina evi?

6Cilo vu ci eci ci kasi loku u tutuiya okuti o tukuluka kotembo yaye.

7Momo elumbu lioku tomba ovihandeleko li kasi ale oku talavaya, puãi u o kasi loku li tutuiya o kuamelela laco toke upiwako.

8Kotembo yaco ukuakutomba ovihandeleko o situluiwa, kuenje Ñala Yesu u nyõla lofela yomẽla waye, haeye u wimula lokumoleha kuaye letukuluko liaye.

9Etukuluko liukuakutomba ovihandeleko liya lovilinga via Satana, kuenje li kala lunene wosi, lovilimbu, lovikomo viesanda.

10Li kalavo lelimbi liosi lievĩho kuava va nyõleha, momo ka va tavele kocisola condaka yocili ha va popelua.

11Oco Suku o va tumisa elimbi limue li kuete ongusu yoku va tavisa kuhembi,

12okuti vosi ka va kolelele ondaka yocili, puãi va sanjukila evĩho, va pisiwa.

13Etu, puãi, a vamanji wa soliwi la Ñala, ca tu sesamela oku vu panduila ku Suku olonjanja viosi, momo tunde kefetikilo Suku wo noli okuti vu popelua loku kolisua le Espiritu, kuenda loku kolela ondaka yocili.

14Oco wo kovongeli londaka yetu yiwa, okuti vu kuata ulamba wa Ñala yetu Yesu Kristu.

15Oco, a vamanji, talami ngõ. Kuateleli ovina tuo longisi, ci kale londaka yomẽla, ci kale lukanda.

16Kaliye, Ñala yetu Yesu Kristu eye muẽle, kuenda Suku Isietu, u wa tu sola, haeye, mekonda liocali caye, wa tu iha elembeleko ka li pui lelavoko liwa,

17va lembe ovitima viene, loku vi ikisa upange wosi uwa londaka yosi yiwa.

← Chapter 1 Jump to: Chapter 3 →