Hebrews 10

Umbundu Bible (Embimbiliya - Bíblia Sagrada em Umbundu)

← Chapter 9 Jump to: Chapter 11 →

1Momo, omo ovihandeleko ovio undembo wovina viwa vi laika oku iya, okuti ka vi lekisa uwa wavio wocili, oco lalimue eteke vi tẽla oku kanguisa ava veyaiya unyamo kunyamo oku lumba lumba ovilumba vimuamue ño.

2Nda hacoko, nda oku vi lumba hẽ, ka kua puile? Momo vakuakufendela, nda va yelisua olumue evĩho, nda ka va kala vali lohele yakandu.

3Puãi lovilumba viaco va ivaloka akandu unyamo kunyamo.

4Momo osonde yolonui leyi yolohombo ka yi tẽla oku imula akandu.

5Oco, eci Kristu eya kilu lieve, wa linga hati, Ovilumba loviali kua vi yonguile, puãi wa ngangiliyila etimba.

6Ovilumba vioku yoka levi viakandu kua vi sanjukilile.

7Oco nda linga siti, A Suku, ndeya oku linga ocipango cove, ndeci ca sonehiwila ame vociña celivulu.

8Eci ponano Yesu a pitulula hati, Ovilumba vioku eca levi vioku yoka, levi vioku pia elisi, levi vioku tuvika akandu, kua vi yonguile, okuti evi vi lumbiwa ño omo oco ca handelekiwa,—

9oco wa vokiyako, hati, Ndeya oku linga ocipango cove. Catete wa ci imula ha kolisa cavali.

10Oco, omo a panga ndomo, etu tua kolisua lokulumbiwa olumue kuetimba lia Yesu Kristu.

11Wosi ocitunda o talayama eteke keteke oku fendela loku lumba lumba ño-o ovilumba vimuamue, haivio ka vi tẽla oku imula akandu.

12Kristu puãi, eci a lumbila akandu ocilumba cimuamue, oco a tumala oloneke ka vi pui kondio ya Suku.

13Tunde opo, o talamela toke ovanyali vaye va kapiwa ndociliatelo colomãi viaye.

14Momo, locilumba cimuamue, wa kanguisa hũ ava va kolisua.

15Kuenje Espiritu Sandu wa tu imbilavo uvangi. Momo, eci Ñala a linga hati,

16Ocisila ndi lisila lavo kovaso yoloneke viaco, ceci, Ñapa ovihandeleko viange kovitima viavo. Ndi vi soneha volonũlo viavo.—

17Oco noke wa vokiyako, hati, Akandu avo lolohõle viavo si vivaluka vali.

18Oku kuli ongecelo yovina evi, oko ka kuli vali ovilumba viakandu.

19Oco a vamanji, omo tu kuete utõi woku iñila vocitumalo ci kola mekonda liosonde ya Yesu,

20loku kuama onjila eye a tu vanguluila, haiyo onjila yokaliye yi kasi lomuenyo kuenda yi pita vokati kongumbo, ndokuti vetimba liaye,

21lomo tu kuete Ocitunda ca piãla ca viala onjo ya Suku,

22oco tu ameliko lovitima viocili haivio via kolisua lekolelo. Tuamelako tupu ovitima vietu via nyiliwa okuti ka vi tu vetisa evelo, latimba etu a sukuiwa lovava a yela.

23Tu kakateli kelavoko lietu, oku tatãla lakamue, momo u wa likuminya wa kolelua.

24Tu sokololi ndomo tu tẽla oku livetiya pokati oku kala locisola lovilinga viwa.

25Ka tu ka liweki oku ongoloka ndomo vamue va lingainga, puãi tu likuatisi pokati lalungulo, ca piãla vali omo vu lete okuti eteke liaco li kasi ocipepi.

26Momo, nda kovaso yoku kũlĩha onjila yocili tu linga vali akandu locipango, ka ku kala vali ocilumba cimula akandu.

27Ku kala lika elavoko li linga usumba lioku pisiwa, kuenda onyeño yi lia ovanyali va Suku ndondalu.

28Umue nda wa tomba ovihandeleko via Mose o fa lolombangi vivali pamue vitatu, lohenda lakamue.

29Wa simi ndati? U wa lavisa Omõla a Suku hẽ, haeye wa pembula osonde yocisila a kolisua layo, haeye wa fũkĩlisa Espiritu liocali, eyambulo a sesamela ka li piãla vali enene?

30Momo tua kũlĩha u wa popia hati, Okuyambula kuange, haime fetuluinya, haeye wa popiavo hati, Yehova o tetuluila omanu vaye.

31Ci linga usumba oku fa peka lia Suku o kasi lomuenyo.

32Puãi ivaluki oloneke viokonyima, ndomo wa pandikisi pokati kohali eci ocinyi co tuili.

33Olonjanja wa fũkĩlisui loku kangisua kovaso owiñi. Olonjanja ene muẽle wa pangi oku kala pamosi lava va talisua ndomo ohali.

34Momo wa lingi olomandekua ohenda, kuenje wa sanjuki ndaño ovikuata viene via pundiwa, momo wa kũlĩhi okuti vu kuete ovikuata via velapo, haivio ka vi pui.

35Oco, ko ka inasi ekolelo liene, momo li kasi lonima ya lua.

36Momo vu sukila epandi okuti, eci wa lingi ale ocipango ca Suku, oco vu tambula eci co likuminyiwi.

37Momo pa kamba handi okatembo katitotito. U o laika oku iya, iya, ka taluka.

38Puãi Ukuesunga wange o muila omuenyo kekolelo. Nda o ci tokoka, utima wange ka u u sanjukila.

39Etu puãi katuakuaku tokokako loku nyõleha, tuakuekolelo, haetu tu tata ovitima vietu.

← Chapter 9 Jump to: Chapter 11 →