Hebrews 5

Umbundu Bible (Embimbiliya - Bíblia Sagrada em Umbundu)

← Chapter 4 Jump to: Chapter 6 →

1Momo ocitunda cinene cosi ca noliwa pokati komanu ci tukuiwila oku linga mitakati pokati komanu la Suku, loku lumbila akandu ovilumba vioku yoka levi vioku pia elisi.

2Ci tẽla oku livala evando la vakuanumbi, lava va lueya, momo eye muẽle wa hongua loku leñela.

3Oco o kuete ocikundi coku lumbila akandu aye muẽle ndeci o lumbila akandu omanu.

4Kuenje lomue o likapa esumbilo liaco eye muẽle, te o tukuiwa la Suku, ndeci Arone a tukuiwa.

5Haico Kristu layevo ka lipandiyile okuti o linga ocitunda cinene, puãi wa noliwa lu wa popia laye hati, Ove vumõlange, etaili nda ku cita.

6Ndeci a popiavo kuiñi hati, Vucitunda ka ci pui, Ove o linga ño-o hũ ocitunda ndocisoko ca Melikicedeke.

7Yesu, koloneke a kala letimba, wa lomba lomba, loku likutalaila, loku liyula lasuelela ku wa tẽla oku u popela kokufa, kuenje wa yeviwa momo wa sumbila Suku.

8Ndaño eye Omõla, haimo, kohali yaye, wa lilongisa epokolo.

9Eci a kanguisua wa linga ono yeyovo ka li pui lia vosi vo pokola.

10Suku wo tukula hati, Eye ocitunda cinene ndocisoko ca Melikicedeke.

11Kondaka eyi tu kuete ca lua coku popia, puãi ca tĩla oku ci lombolola, momo ene wa lingi ovisitatui.

12Momo, ndaño otembo yilo nda wa sesameleli oku linga alongisi, haimo vu sukila umue o vu longisa ovina viefetikilo liolondaka via Suku. Vu sukila asenjele, hakulia kua kolako.

13Momo wosi o lia lia asenjele ka kũlĩhile ondaka yesunga, momo oñaña.

14Puãi okulia kua kola kuakulu, okuti kuava va tẽla oku tepisa pokati keci ciwa leci cĩvi, omo olondunge viavo via pindisua.

← Chapter 4 Jump to: Chapter 6 →