Hebrews 13

Umbundu Bible (Embimbiliya - Bíblia Sagrada em Umbundu)

← Chapter 12 Jump to:

1Ocisola coku lisola pokati nda vamanji camameko.

2Ko ka ekeleli oku hindikisa akombe, momo vamue, eci va ci linga, va yekisa ovangelo kuenje ka va ci kũlĩhile.

3Ivaluki ava va kasi vokayike ndu wa kutiwi kumue lavo. Ivaluki ava va kasi loku kangisua, momo lenevo vu kasi latimba.

4Olohuela vi sumbiwe lomanu vosi, lula waco ka u ka kale levĩho, momo Suku o tetuluila vakahonga la vakahokolo.

5Ko ka kali locipululu colombongo. Tẽli lovina vu kuete, momo eye muẽle wa linga hati, Ame lalimue eteke hu yanduluka ndaño oku ku sia.

6Oco tu tẽlela oku popia lutõi, tuti, Yehova eye oñuatisi yange, si kuata usumba. Omunu hẽ, o ndinga nye?

7Ivaloki asongui vene, ava vo sapuilili ondaka ya Suku. Sokololi esulilo liomuenyo wavo. Setukuli ekolelo liavo.

8Yesu Kristu ka pongoloka. Ndeci a kala hẽla haico a kala etali, kuenda haico a kala oloneke vi enda ño-o hũ, ka vi pui.

9Ko ka lueyisui lovilongua viñi viñi, haivio vi tunda kuiñi kuiñi. Momo ca sunguluka okuti utima u kolisua locali ca Suku, haloviliako, evi ka via kuatisile ava va pindamua lavio.

10Etu tu kuete utala umue wokuti, ava va lava otavernakulo ka va kuete omoko yoku liako.

11Momo ovinyama vina ocitunda cinene ci nenela osonde yavio akandu vocitumalo ci kola, atimba avio a timihiwila konele yocilombo.

12Haico Yesu layevo wa tala ohali konele yocilombo okuti omanu vaye va kolisiwa losonde yaye muẽle.

13Oco tu tundili kokuaye konele yocilombo ha tu u lavisiwila.

14Momo kulo ka tu kuete imbo li tumala osimbu, puãi tu sanda limue li laika loku iya.

15Oco tu lumbi lumbi ku Suku ocilumba cesivayo haico epako liovimela via tava konduko yaye. Yesu o linga Mitakati o ci pitiya ku Suku.

16Ko ka ivaliko oku lingainga ciwa, loku lia vela pokati, momo Suku o sanjukila ovilumba ndevi.

17Pokoli kasongui vene loku linga eci va tuma, momo va kasi loku lavulula ovimuenyo viene ndava va lombolola noke ndomo va vi tata. Pokoli kokuavo okuti va ci linga lesanju, haloku lisiõsiõlako, momo nda va ci linga loku lisiõsiõla nda ka cu kuatisi.

18Tu pinga okuti vu tu likutilila momo tua soka tuti, Tu kasi lutima wa pua episo, omo tu yongola oku linga esunga lovina viosi.

19Kuenje ndu vetiyi ca lua oku ci linga ndokuti niuwiwa kokuene lombili.

20Kaliye Suku yombembua, u wopa kuava va fa ungombo unene wolomeme, Ñala yetu Yesu Kristu, losonde yocisila ka ci pui,

21eye a vu malehise ovina viosi viwa ho lingi ocipango caye, haiye a talavaye vovitima viene la Mitakati Yesu Kristu oku linga eci co sungulukila. Kokuaye ku kale ulamba toke koloneke ka vi pui. Amene.

22A vamanji, ndu pingi okuti vu kolisako londaka yange yelungulo, momo ndo soneheli olondaka ka via luile.

23Limbuki okuti manjetu Timoteo vo weca. Nda iya ndopo tu vu muila kumuamue.

24Lamipo asongui vene vosi lolosandu viosi. Va Italia vo lamipo.

25Ohenda yi kale lene vosi. Amene.

← Chapter 12 Jump to: