Jonah 1

Umbundu Bible (Embimbiliya - Bíblia Sagrada em Umbundu)

Jump to: Chapter 2 →

1Ondaka ya Yehova yeya ku Yona, omõla a Amitai, yiti,

2Votoka. Kuende kimbo linene lia Ninivei. Ka li sapuile episo lialio, momo ũvi walio wa yevala kokuange.

3Yona puãi wa wila vonjila yoku enda ko Tarsisi ha tila Yehova. Wa lokila ko Yopa. Wa sanga onaviyu yenda ko Tarsisi. Wa feta owombo, kuenje wa iñila vokati, oku enda kumosi lavo ko Tarsisi, ha tila Yehova.

4Yehova puãi wa tuma ofela yonupi, kuenje vokalunga mueya ehunguhungu ndokuti onaviyu ya si oku nyanyõha.

5Noke vakuanaviyu va kuata usumba, yu va vilikiya, u ku suku yaye, u ku suku yaye. Va imba vokalunga ovikuata via kala vonaviyu ha va leluisa ulemo wayo. Yona puãi wa lokila ale vokati konaviyu. Wa pekela otulo tualua.

6Oco muẽleanaviyu weya kokuaye, wa popia laye hati, Okuatulo! Nye cu ku kuete? Pasuka. Vilikiya ku Suku yove. Mbi eye o tu sokolola okuti ka tu nyõlẽha.

7Kuenje va likunda pokati, omunu lomunu, vati, Enjui. Tu ti ocela, oco tu kũlĩhe u wa tu nenẽla ũvi owu. Oco va ta ocela kuenje ca veta Yona.

8Yu va popia laye vati, Tu sapuileko, wa tu nenẽla ũvi owu helie? Upange wove we? Wa tunda pi? Kofeka yene pi? Vukuepata lie?

9Kuenje wa va kumbulula hati, Ame ndu Heveru. Nda sumbila Yehova Suku yovailu, haeye wa tunga okalunga losi.

10Oco alume va yokoka calua, kuenje va popia laye vati, Eci wa linga oco nye? Momo alume vaco va kũlĩha okuti wa tila Yehova, omo wa va ci sapuila ale.

11Oco va popia laye, vati, Etu tu linga nye love okuti okalunga ka tu tulumũhĩla? Momo okalunga ka kala loku amamako koku tema.

12Eye wa popia lavo, hati, Njeluli. Njimbi vokalunga oco okalunga ka tulumũha; momo ame ndi ci okuti ehunguhungu lieya kokuene mekonda liange.

13Haimo lumue vakuanaviyu va tapula longusu ya lua ha va pitila kongongo. Puãi va ci lembua omo akimba a va samõhãila vali ca piãla.

14Oco va vilikiya ku Yehova, vati, A Yehova, tua samba. Ka tu ka nyõlẽhe mekonda liomuenyo wulume u. Kuenje ku ka tu kape ongole yosonde yaye nda ka kuete eko; momo ove, a Yehova, wa linga ndeci wa panga.

15Oco va yelula Yona, vo wimba vokalunga, kuenje okalunga ka tulumũha.

16Oco alume vaco va kuatela Yehova usumba wa lua. Vo lumbila ovilumba loku lisila ovisila.

17Yehova wa tuma olũsi lunene oku ina Yona. Kuenje Yona wa kala vimo liolusi ovotanya atatu lovoteke atatu.

Jump to: Chapter 2 →