Jonah 2

Umbundu Bible (Embimbiliya - Bíblia Sagrada em Umbundu)

← Chapter 1 Jump to: Chapter 3 →

1Osimbu a kala vimo liolusi oco Yona a likutilila ku Yehova, Suku yaye,

2hati, Kohali yange nda vilikiya ku Yehova, kuenje eye wa nambulula. Nda liyeyela valondo onjembo, kuenje wa njeva.

3Ove wa njimba pelondo vokati kokalunga, kuenje olusipa lua ñuala. Akimba ove osi, lapuku, a pita kilu liange.

4Oco nda popia siti, Nda takumuĩwa kokuove. Mõla vali ndati onembele yove yi kola?

5Ovava a ñuala loku sipata. Okalunga ka ñuala ocingonja. Ovitangitangi via nanga kutue.

6Nda vomba toke kafetikilo olomunda. Nda pitila vofeka yimue omo nda yikiwila lovisingo otembo ka yi pui. Puãi ove wa njupa vonjembo, a Yehova, a Suku yange.

7Eci utima wa hongua vokati kange oco nda ivaluka Yehova. Elombelo liange lia pitila kokuove vonembele yove yi kola.

8Ava va sumbila ovina viaño viuhembi va sia ocikolo cavo cocili.

9Ame puãi hu lumbila ocilumba colopandu via lua. Eci nda likuminya oco ndinga. Oku popela ku tunda ku Yehova.

10Oco Yehova wa popia lolusi kuenje lua sanjela Yona kongongo.

← Chapter 1 Jump to: Chapter 3 →