Leviticus 13 — Umbundu Bible (Embimbiliya - Bíblia Sagrada em Umbundu)

1Kuenje Yehova wa popia la Mose kuenda Arone hati,

2Eci omunu vekova liositu yaye mu kasi apa pa lenda, pamue ombande, pamue papa pa ñañala, kuenda pa linga kekova liositu yaye uvei wilundu, oco vo nena kocitunda Arone, pamue ku umue womãla vaye ovitunda.

3Kuenje ocitunda ci vanja kuvei kekova liositu. Oco nda oluveyi luvei lua pongoloka lu yela kuenda okumõlẽha kuvei waco kua longa kosi yekova liositu yaye uvei waco uvei wilundu, kuenje ocitunda cu vanja, kuenda ca tukuila okuti wa vĩhĩsua.

4Apa pa ñañala nda pa yela vekova liositu yaye kuenda okumõlẽha kuaco ka kua longele kosi yekova kuenda oluveyi ka lu yeli, oco ocitunda ci yika u o kasi luvei waco oloneke epanduvali.

5Oco ocitunda cu vanja keteke liepanduvali, kuenje tala, nda vovaso aye mu molẽhẽla huti ño uvei u tãi, ka wa sambukilile vekova, oco ocitunda cu yika vali oloneke epanduvali.

6Ocitunda cu vanja vali keteke liepanduvali, kuenje, nda uvei u wumbula, kuenda nda ka wa sambukilile vekova, oco ocitunda cu sapuila hati, O yela, uvei waco ombande yaño. Eye o sukula uwalo waye kuenje wa yela.

7Puãi nda ombande yamako vekova konyima yaco a limolẽhisile kocitunda okuyela kuaye, eye iya, o limolẽhisa vali kocitunda.

8Kuenje ocitunda ci vanja, nda ombande yamako vekova, oco ocitunda cu tukuila okuti wa vĩhĩsua, uvei waco ilundu.

9Eci uvei wovilundu u li vomunu oco vo tuala kocitunda.

10Ocitunda ci vanja kuenje, nda kekova ku kasi apa pa lenda haipo pa yela, yu ca pongoluisa oluveyi oku yela, ku kasivo epute pokulenda kuaco,

11oco ilundu viosimbu vi kasi ale vekova liositu yaye. Ocitunda cu tukuila okuti wa vĩhĩsua. Ko yiki momo wa vĩhĩsua.

12Kuenda nda ilundu viaco via lisanduila kekova, ilundu viaco yu vi kasi vekova liosi liukuovei tunde kutue toke kolomãi, ndeci ci mõlẽhela kocitunda,

13Oco ocitunda ci vanja kuenje nda ilundu via sĩkĩlila etimba liaye liosi, ci tukuila ukuovei waco hati, Wa yela, viosi via pongoloka vi yela; wa yela muẽle.

14Puãi nda epute li mõlẽha ketimba liaye, wa vĩhĩsua.

15Kuenje ocitunda ci vanja kepute kuenje cu tukuila okuti wa vĩhĩsua; epute liaco lia vĩha; uvei waco ilundu.

16Pamue nda epute li pongoloka vali okuti ositu yaco yi yela, oco iya kocitunda,

17kuenje ocitunda cu vanja. Nda uvei waco u yela oco ocitunda ci tukula ukuovei hati, Wa yela, wa yela muẽle.

18Oco ositu eci yi kasi locipumbu kekova liaco yu ca kaya,

19kuenje komangu yaco ku piñala oku lenda ku yela, pamue papa pa ñañala haipo pa kusuluka, oco ku lekisiwa kocitunda.

20Ocitunda ci vanja kuenje nda okumõleha kua longela kosi yekova, kuenda oluveyi luaco lua pongoloka lu yela, oco ocitunda cu tukula okuti wa vĩhĩsua. Uvei waco ovilundu, via tuika vocipumbu.

21Puãi nda ocitunda ci ci vanja kuenje ka kuli oluveyi lu yela, ka ca longelele kosi yekova puãi ci wumbula, ocitunda cu yika oloneke epanduvali.

22Nda ci sambukila vekova, oco ocitunda cu tukula hati, Wa vĩhĩsua, oco uvei.

23Puãi nda papa pa ñañala pa tãi vomangu yaco, ka pa sambuka, oco emome liocipumbu, kuenje ocitunda cu tukula hati, O yela.

24Pamue ositu nda ya pia londalu kekova liaco, kuenje epute liaco li ñañala paco pa pia, lositu yi kusuluka pamue yi yela,

25oco ocitunda ci ci vanja kuenje nda oluveyi lu kasi apa pa ñañala lua pongoloka lu yela, kuenda okumõlẽha kuaco kua longela kosi yekova, uvei waco ilundu, via tuikila apa pa pia. Kuenje ocitunda cu tukula okuti wa vĩhĩsua, uvei waco ilundu.

26Puãi nda ocitunda ci ci vanja kuenje ka kuli oluveyi lu yela apa pa ñañala, ka pa longelele kosi yekova, puãi pa wumbula, nda oco ocitunda cu yika oloneke epanduvali.

27Kuenje keteke liepanduvali ocitunda cu vanja, nda pa sambukila kekova ocitunda cu tukula okuti wa vĩhĩsua, uvei waco ovilundu.

28Kuenje nda papa pa ñañala pa tãi vomangu yaco, ka pa sambukilile vekova, puãi pa wumbula, oco okulenda kuoku pia. Ocitunda cu tukula hati, O yela, olio emome lioku pia.

29Nda ulume pamue ukãi o kasi luvei kutue pamue kolonjele,

30oco ocitunda ci vanja uvei kuenje nda okumõlẽha kuaco kua longela kosi yekova, kuenda ku kasi ocifuko ca pelevala, ci yeluluka, ocitunda cu tukula hati, Wa vĩhĩsua, oco utumbutumbu, ovio ilundu viutue pamue violonjele.

31Kuenje nda ocitunda ca vanja kuvei wutumbutumbu kuenje okumõleha kuaco ka kua longele kosi yekova, kuenda ka mu kasi esinga li tekãva vokati kaco, oco ocitunda ci yika ukuovei waco wutumbutumbu oloneke epanduvali.

32Eteke liepanduvali ocitunda ci vanja uvei kuenje nda utumbutumbu ka wa sambukile, kuenda ka muli esinga li yeluluka, loku mõleha kuaco kutumbutumbu ka kua longele kosi yekova,

33oco eye a pemuiwe, puãi utumbutumbu waco ko ka pemũlue. Ocitunda ci yika vali ukuotumbutumbu waco oloneke epanduvali.

34Keteke liepanduvali ocitunda ci vanja utumbutumbu kuenje nda utumbutumbu waco ka wa sambukilile vekova, lokumõleha kuaco ka kua longele kosi yehova, oco ocitunda cu tukula hati, Wa yela. O sukula uwalo waye kuenje o yela.

35Puãi nda utumbutumbu u sambukila vali kekova eci a yelisua,

36ocitunda cu vanja kuenje, nda utumbutumbu wa sambukila kekova, ocitunda ka ci vanjiliya esinga li yeluluka; eye wa vĩhĩsua.

37Puãi nda vovaso aye utumbutumbu wa tepuluka, lesinga li tekava lia kulilamo, oco utumbutumbu waco wa kaya, eye wa yela. Kuenje ocitunda cu tukula hati, Wa yela.

38Nda ulume pamue ukãi o kuete kekova lietimba liaye amañana a ñañala, a yela loku ñañala,

39ocitunda ci vanja kuenje nda amañana a ñañala kekova lietimba liaye a yeluluka ño, o olombulu viaño via tuikila kekova, eye o yela.

40Nda ocifuko comunu ca puako kutue waye eye ukuetoto, puãi o yela.

41Kuenje nda ocifuko caye ca puako konele yimue yutue yokovaso, eye ukuepela liokocipala, puãi o yela.

42Puãi nda ketoto liutue waye pamue kepela liokocipala ku kasi uvei u kusuluka, uvei waco ilundu vi li loku tuikila vetoto pamue kepela liokocipala.

43Oco ocitunda cu vanja kuenje nda oku lenda kuvei ku kusulukila ketoto liutue waye, pamue kepela likocipala, ndokumõlẽha kuilundu kekova lietimba,

44eye omunu ukuailundu, wa vĩhĩsua. Ocitunda cu tukula hati, Wa vĩhĩsua muẽle, uvei waye u li kutue.

45Ukuailundu o kasi luvei waco o wala olonanga via totoloka, ocifuko caye ci kala onuma, eye o sitika onjembu yokilu, kuenje o vilikiya hati, Nda vĩhĩsua, nda vĩhĩsua.

46Oloneke viosi a kasi luvei wa vĩhĩsua. Wa vĩhĩsua, o kala kala ulika; osinge yaye ka yi kala vocilombo, yi kala vofeka.

47Eci uvei wovilundu u kasi vuwalo umue, ci kale uwalo wovonya omeme, ci kale uwalo wovalatanya,

48ci kale kalinya usõvi pamue kalinya upati, a kala ovalatanya, ndaño ovonya omeme, ci kale kocipa pamue kueci ca tungiwa locipa,

49nda uvei waco u talala pamue u kusuluka vuwalo pamue vocipa, pamue valinya usõvi pamue upati, pamue vocina cimue cocipa, oco uvei waco ovilundu, kuenje ci lekisiwa kocitunda.

50Oco ocitunda ci vanja kuvei waco, kuenje ci yika eci ci kasi luvei waco oloneke epanduvali.

51Keteke liepanduvali ci vanja kuvei waco; nda uvei waco wa sambukila kuwalo waco, ci kale kalinya usõvi, ci kale kalinya upati, ci kale kocipa nda nye nda nye upange waco va linga locipa, uvei waco ilundu viukuakutoñola, ca vĩhĩsua.

52Oco o yoka uwalo waco, ndaño uvei u kasi kalinya usovi pamue kalinya upati, ndaño kovonya omeme ndaño kovalatanya, ndaño kovonya omeme ndaño kovalatanya, ndaño kocina cimue cocipa; momo uvei waco ilundu viukuakutoñola; ci yokiwa londalu.

53Oco nda ocitunda ci vanja kuenje uvei waco ka wa sambukilile vuwalo, ndaño kalinya usõvi pamue kalinya upati ndaño kumue kocipa,

54oco ocitunda ci va tuma oku sukula eci ci kasi luvei, kuenje ci ci yika vali oloneke epanduvali.

55Kuenda ocitunda ci vanja eci va sukula ale uvei waco kuenje nda uvei ka wa pongolokele ocivalo, ndaño uvei waco ka wa sambukile, wa vĩhĩsua; o u yoka londalu. Uvei waco ovilundu viukuakutoñola, ndaño u kasi vokati, ndaño kilu.

56Kuenje nda ocitunda ci vanja kuenje uvei waco wu wumbula kovaso yokusukula kuaco, ci u tola kuwalo, pamue kocipa, pamue kalinya usõvi, pamue kalinya upati.

57Oco nda a mõlẽhẽla ño vuwalo waco, ndaño kalinya usõvi, ndaño kalinya upati, pamue kumue kocipa, u kasi loku sambuka, ove o yoka londalu eci ci kasi luvei waco.

58Luwalo waco, ndaño alinya usõvi, ndaño alinya upati, ndaño cimue cocipa, ove o ci sukula, nda uvei wa tundamo, u sukuiwa luvali kuenje u yela.

59Evi ovio ovihandeleko viuvei wilundu vi kasi kuwalo wovonya omeme pamue wovalatanya, ndaño kalinya usõvi, ndaño kalinya upati, pamue kocimue cocipa, oku tukula hati, Ca yela pamue oku tukula hati, Ca vĩhĩsua.