Psalms 89

Umbundu Bible (Embimbiliya - Bíblia Sagrada em Umbundu)

← Chapter 88 Jump to: Chapter 90 →

1Njimbila ocisola ka ci pui ca Yehova oloneke viosi. Lomela wange sapula kovitumbulukila viosi ocili cove.

2Nda linga siti, Ocisola ka ci pui ci kolisua ñ-o hũ. Kilu o kolisa ocili cove.

3Nda likuminya ohuminyo lu nda nola. Nda lisinga lukuenje wange Daviti,

4siti, Ñolisa ombuto yove oloneke ka vi pui. Numalisa ocalo cove cusoma toke kovitumbulukila viosi.

5Ilu li sivave ovikomo viove, a Yehova, locili cove vekongelo liava va kola.

6Vovailu helie o tẽla oku sokisua la Yehova? Pokati komãla volosuku helie wa lisoka la Yehova?

7Vongombo yava va kola Suku ukuakululumisa cimue. O lingisa usumba wa velapo, vosi vo ñuala ci sule.

8A Yehova Suku yolohoka, helie wa lisoka love kunene, a Yehova? Ocili cove ca ku ñuala.

9Ove o viala unene wokalunga. Eci akimba aco a tumuha ove o a tulumula.

10Wa teya Egito ndu wa ipaiwa ongambu. Wa sandula ovanyali vove lokuokuo kuove kuongusu.

11Ilu liove, osi layovo yove. Oluali lovina viosi vi kasimo ove wa vi lulika.

12Norte la Sul ove wa vi sovola. Tavore la Hermone vi yolela onduko yove.

13O kasi lokuokuo kua pama. Eka liove lia kola, eka liove liondio lia kemãla.

14Esunga loku sunguluka ovio ociseveto cocalo cove. Ocisola ka ci pui kuenda ocili vi ku pitaila kovaso.

15A Yehova, omanu va kũlĩha ondaka yonjolela, haivo va endaila vocinyei cocipala cove,

16loku yolela onduko yove eteke liosi, kuenda oku kemalisa esunga liove, ove va sumũlũha.

17Momo ove wulamba wunene wavo. Lombinga yetu yi kemala omo ove uñuatisi yetu.

18Momo Yehova eye ombindikiyo yetu. U o kola wa Isareli eye Soma yetu.

19Kosiahũlu wa popia lu wove wa koleliwa. Wa popela vocinjoinjoi, huti, Nda kapa ekolowa kumue wa pama. Nda kemalisa umue wa noliwa pokati komanu.

20Nda sanga Daviti ukuenje wange. Ndo waveka lulela wange u kola,

21okuti eka liange li kala kala laye, lokuokuo kuange ku u pamisa.

22Unyali ko yuli, kuenda vakuevĩho ka vo ketisa.

23Nyanyowaila ovanyali vaye kovaso aye. Nyõla ava vo suvuka.

24Kokuaye puãi ku tiama ocili cange kuenda ocisola cange ka ci pui. Ombinga yaye yi kemalisua mekonda lionduko yange.

25Ñapa eka liaye kokalunga, eka liaye liondio polondui.

26O mbilikiya hati, Ove wu Tate, wu Suku yange, haive uwe lieyovo liange.

27Ndu tukula nuñulu yange. Ndu piãlisa pokati kolosoma viokilu lieve.

28Ndu solekela ocisola cange ka ci pui oloneke viosi. Ohuminyo yange kokuaye yi linga yocili.

29Ombuto yaye ndi yi tumalisa okuti ka yi pui, localo caye ndi ci sokisa loloneke viovailu.

30Nda omãla vaye va yanduluka ovihandeleko viange, nda ka va endi lovihõlo viange,

31nda va sama sama ovisila viange, kuenje ka va pokola kovihandeleko viange,

32oco okulueya kuavo ndi ku longa loluhava, longole yavo lolombole.

33Haimo lumue ocisola cange ka ci pui si ci upi, ndaño ocili cange si ci imula.

34Si nyõli ohuminyo yange. Eci ca tunda komela wange si ci pongolola.

35Cimosi nda lisinga lokukola kuange. Si kembi ku Daviti.

36Ombuto yaye yi kala hũ, ka yi pui. Ocalo caye cenda ño-o kovaso ange ndekumbi.

37Ci kolapo oloneke viosi ndosãi. Uvangi u kasi kovailu u koleliwa.

38Cilo puãi wa takumula, loku pañula, wa temela ombuavekua yove.

39Wa tokoka ohuminyo wa likuminya lu kuenje wove. Wa vĩhisa ekolowa liaye, wa li inasi posi.

40Wa kupula ovimbaka viaye viosi, lolombonge viaye wa vi nyõla.

41Vosi va vinjuka vo punda. Wa linga ocisepelei cava va lisungue laye.

42Wa kemainyisa ovaka olondio ovanyali vaye. Ovanyali vaye vosi wa va sanjuisa.

43Ocili, wa tiula konyima osipata yaye, kuo talamisile vocilunga.

44Wopa epangati peka liaye, localo caye wa ci kupuila posi.

45Oloneke viovukuenje waye wa vi tepulula. Wo kutisa osõi.

46Toke eteke lipi, a Yehova? O lisalamisa ño-o hẽ, oloneke vi enda ño-o hũ? Onyeño yove yi tema tema hẽ ndondalu toke eteke lipi?

47A Yehova, ivaluka omuenyo womunu okuti umbumbulu. Ivaluka okuhongua kuomãla vomanu wa sovola.

48Omunu upi o kala ño lomuenyo, ka mõli okufa? Helie o tẽla oku popela omuenyo waye kunene wonjembo?

49A Yehova, ocisola cove ka ci pui cokosiahũlu, haico wa likuminya locili cove cosi, oku sola laco Daviti, ci kasi pi?

50Ivaluka, a Yehova, efuki liukuenje wove, ndomo ngambata vonete epembe lia ngasa olofeka,

51hailio ovanyali vove va fukũisa lalio, a Yehova, va fukĩlisa lalio olomai viombuavekua yove.

52Yehova a sivayiwe hũ. Amene. Amene.

← Chapter 88 Jump to: Chapter 90 →

Recommended Reading

Commentary Psalms Commentaries → Devotional Psalms Devotional Guide → Get This Bible Umbundu Bible (Embimbiliya - Bíblia Sagrada em Umbundu) Study Bible →