Zechariah 6

Umbundu Bible (Embimbiliya - Bíblia Sagrada em Umbundu)

← Chapter 5 Jump to: Chapter 7 →

1Nda petula vali ovaso kuenje nda mõla akãlu ovita akuãla a tunda pokati kolomunda vivali. Olomunda viaco viosipi.

2Ekãlu liatete lia kokiwa lotuvalu tu kusuka. Eli liavali otuvalu tuaco tu tekãva.

3Ekãlu liatatu otuvalu tuaco tu yela. Leli liakuãla otuvalu tuaco tu kuete avala.

4Nda pula ungelo wa kala loku vangula lame, siti, A Ñala yange, evi nye?

5Kuenje ungelo wa ñumbulula, hati, Evi yi kasi loku enda kolonẽle vikuãla violuali eci via mala oku lilekisa ku Muẽleangongo yosi.

6Ekãlu li kasi lotuvalu tu tekava lia loña kofeka yoko Norte. Otu tu yela tu kuãiko tua loña kofeka yokutakelo. Otu tu kasi lavala tua loña kofeka yoko Sul.

7Eci otuvalu tua tunda tua yaya loku enda oku ñuala ñuala vofeka. Eye wa popia hati, Kuendi ño. Ka ñuali ñuali vofeka. Oco tua ñuala ñuala vofeka.

8Eye wa mbilikiya hati, Tala! Otuo tu kasi loku enda kofeka yoko Norte tu lekisa onyeño nda kuatela ofeka yoko Norte.

9Ondaka ya Yehova yeya kokuange, yiti,

10Tambula ulu lopalata povaka a Heldai, la Toviya, la Yedaya, vana va tunda ko Bavulono, kuenje eteke liaco hailio iñila vonjo ya Yosiya, omõla a Sofoniya.

11Tambula muẽle, povaka avo, opalata lulu oco o tunge ekolowa loku li kapa kutue wa Yehosua, omõla a Yehocadaka, ocitunda cinene.

12Popia laye, huti, Ca popia Yehova Ukualohoka ceci, hati, Tala! Onduko yulume u, eye Cinjovelela. Eye o yovela kocitumãlo caye kuenje o tunga onjo ya Yehova.

13Eye muẽle o tunga onembele ya Yehova. O kala lulamba waco. O tumãla kocalo caye ha viala. Konẽle yocalo caye ku kala ocitunda. Kuenje kavali kavo va kala lutima umuamue.

14Ekolowa li linga lia Heldai la Toviya kuenda Yosiya omõla a Sofoniya. Li kala vonembele ya Yehova ndonjivaluko.

15Kuenje ava va kasi kupãla veya, va kuatisa oku tunga onembele ya Yehova. Kuenje ene vu kũlĩha okuti Yehova Ukualohoka wa numa kokuene. Nda vu pokola lombili kondaka ya Yehova Suku yene ovina evi vi lingiwa.

← Chapter 5 Jump to: Chapter 7 →