Zechariah 9

Umbundu Bible (Embimbiliya - Bíblia Sagrada em Umbundu)

← Chapter 8 Jump to: Chapter 10 →

1Ondaka ya Yehova ya pisa ofeka ya Haladake. Yi pisavo Damasko. Momo ovaimbo a Arame a tiama ku Yehova, ndaño apata osi a va Isareli a tiamavo ku Yehova.

2Hamati, imbo li lisungue laliovo li tiama ku Yehova, kuenda Turo la Sidono, ndaño omanu vaco va lunguka enene.

3Turo lia litungila ovimbaka, lia lilundikila opalata ndoneketela, kuenda ulu ndonata yovaluwa.

4Puãi, tala! Yehova o li upa ovipako vialio, imba ukuasi walio vokalunga. Imbo li liwa londalu.

5Asikelone li ci mõla kuenje li kuata usumba. Gasa laliovo li tala ohali. Haico Ekerone momo elavoko lialio lilinga liaño. Osoma ya Gasa yi nyõlẽha. Asikelone li linga elunda.

6Vakuambuto yiñi va tunga vo Asidode. Nyõla okulituna kua va Filisiti.

7Njupa osonde vovimẽla viavo. Njupavo pokati kovayo avo evi vi lingisa onyanya. Momo lavovo va linga ocisupe ca Suku yetu. Va linga ndepata vo Yuda. Va Ekerone va lisoka la va Yebusi.

8Kuenje ndinga ondavululi yonjo yange okuti lomue o yendela. La-umue unyãli o pitamo vali oku va nyõla. Momo cilo nda ci mõla lovaso ange muẽle.

9Amõla a Siono ukãi, yolela muẽle! Amõla a Yerusalãi ukãi, kaluka lesanju! Momo Soma yove yo, iya kokuove. Eye ukuesunga, haeye upopeli. Wonjuka. Endela kokacimbulu, omõla ocimbulu.

10Ame nyõla akãlu ovita a Efarimi, lotuvalu tuovita tua Yerusalãi. Ohonji yoku yaka layovo yi nyõlẽha. Eye o kundila olofeka ondaka yombembua. Uviali waye u kala tunde kokalunga toke kokalunga kuenda tunde ko Lui toke kasukiyo oluali.

11Puãi ove, mekonda liocisila cosonde nda lisila love, njupa olohute viove vocitunu ca longa ka ci kuete ovava.

12Ene alohute vielavoko, tiukili kombonge yene. Ndu sapuili etali, siti, Ndu piñainyalĩpo luvali.

13Momo nda peteka Yuda ha lingi ohonji yange. Nda lingisa Efarimi usongo wayo. A Siono, omãla vove valume ndi va katuila omala valume va Helasi! Hu sokisa ndosipata yukuakuyaka.

14Noke Yehova o va mõlẽhẽla kilu. Usongo waye u tunda ndociliakulo. Ñala Yehova o sika olumbeta kuenje endela vovipepe vioko Sul.

15Yehova Ukualohoka o va vindikiya. Lovo va nyõla loku kosa vakuakuimba apipili. Va nyua osonde yavo ndovinyu. Ve yuka ndokopo. Ve yuka osonde ndavindi utala.

16Eteke liaco Yehova Suku yavo o va popela momo ovo ocunda comanu vaye. Momo va ninila vofeka yaye ndovawe a tĩla vekolowa.

17Uwa waco u lua cimue! Lunumbu waco lawovo u lua. Otiliku yi sanjuisa akuenje, kuenda ovinyu viokaliye vi sanjuisa afeko.

← Chapter 8 Jump to: Chapter 10 →