Ecclesiastes 11

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 10 Jump to: Chapter 12 →

1Apní roṭí pání meṉ ḍal de; kyúṉki tú bahut dinoṉ ke ba‘d use páegá.

2Sát ko, balki áṭh ko, hissa de; kyúṉki tú nahíṉ jántá ki zamín par kyá balá áegí.

3Jab bádal pání se bhare hote haiṉ, to zamín par baraskar ḳhálí ho játe haiṉ; aur agar daraḳht junúb kí taraf yá shimál kí taraf gire, to jaháṉ daraḳht girtá hai, wahíṉ paṛá rahtá hai.

4Jo hawá ká ruḳh dekhtá rahtá hai, wuh botá nahíṉ; aur jo bádaloṉ ko dekhtá hai, wuh káṭtá nahíṉ.

5Jaisá tú nahíṉ jántá hai, ki hawá kí kyá ráh hai, aur hámila ke rihm meṉ haḍḍiyáṉ kyúṉkar baṛhtí haiṉ; waisá hí tú Ḳhudá ke kámoṉ ko jo sab kuchh kartá hai, nahíṉ jánegá.

6Subh ko apná bíj bo, aur shám ko bhí apná háth ḍhílá na hone de: kyúṉki tú nahíṉ jántá ki un meṉ se kaun sá bárwar hogá, yih, yá wuh, yá donoṉ ke donoṉ barábar baromand hoṉge.

7Núr shírín hai, aur áftáb ko dekhná áṉkhoṉ ko achchhá lagtá hai.

8Háṉ, agar ádmí barasoṉ zinda rahe, to un meṉ ḳhushí kare; lekin táríkí ke dinoṉ ko yád rakkhe, kyúṉki wuh bahut hoṉge. Sab kuchh jo átá hai butlán hai.

9Ai jawán, tú apní jawání meṉ ḳhush ho, aur us ke aiyám meṉ apná jí bahlá, aur apne dil kí ráhoṉ meṉ, aur apní áṉkhoṉ kí manzúrí meṉ chal: lekin yád rakh, ki in sab bátoṉ ke liye Ḳhudá tujh ko ‘adálat meṉ láegá.

10Pas g̣am ko apne dil se dúr kar, aur badí apne jism se nikál ḍál; kyúṉki laṛakpan aur jawání donoṉ bátil haiṉ.

← Chapter 10 Jump to: Chapter 12 →