Ecclesiastes 5

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 4 Jump to: Chapter 6 →

1Jab tú Ḳhudá ke ghar ko játá hai, to sanjídagí se qadam rakh; kyúṉki shanawá hone ke liye jáná ahmaqoṉ ke se zabíhe guzránne se bihtar hai; is liye ki wuh nahíṉ samajhte ki badí karte haiṉ.

2Bolne meṉ jaldbází na kar, aur terá dil jaldbází se Ḳhudá ke huzúr kuchh na kahe; kyúṉki Ḳhudá ásmán par hai, aur tú zamín par; is liye terí báteṉ muḳhtasar hoṉ.

3Kyúṉki kám kí kasrat ke bá‘is se ḳhwáb dekhá játá hai; aur ahmaq kí áwáz bátoṉ kí kasrat hotí hai.

4Jab tú Ḳhudá ke liye mannat máne, to us ke adá karne meṉ der na kar; kyúṉki wuh ahmaqoṉ se ḳhush nahíṉ hai; tú apní mannat ko púrá kar.

5Terá mannat na mánná is se bihtar hai, ki tú mannat máne aur adá na kare.

6Terá muṉh tere jism ko gunahgár na banáe; aur firishte ke huzúr mat kah, ki Bhúl chúk thí; Ḳhudá terí áwáz se kyúṉ bezár ho, aur tere háthoṉ ká kám barbád kare?

7Kyúṉki ḳhwáboṉ kí ziyádatí aur batálat aur bátoṉ kí kasrat se aisá hotá hai; lekin tú Ḳhudá se ḍar.

8Agar tú mulk meṉ miskínoṉ ko mazlúm aur ‘adl o insáf ko matrúk dekhe, to is se hairán na ho; kyúṉki ek baṛoṉ se baṛá hai, jo nigáh kartá hai, aur koí in sab se bhí baṛá hai.

9Zamín ká hásil sab ke liye hai, balki káshtkárí se bádsháh ká bhí kám nikaltá hai.

10Zardost rupaye se ásúda na hogá; aur daulat ká cháhnewálá us ke baṛhne se ser na hogá. Yih bhí butlán hai.

11Jab mál kí firáwání hotí hai, to us ke khánewále bhí bahut ho játe haiṉ, aur us ke málik ko siwá is ke ki use apní áṉkhoṉ se dekhe âur kyá fáida hai?

12Mihnatí kí níṉd míṭhí hai, ḳhwáh wuh thoṛá kháe, ḳhwáh bahut; lekin daulat kí firáwání daulatmand ko sone nahíṉ detí.

13Ek balá e ‘azím hai, jise maiṉ ne dunyá meṉ dekhá, ya‘ní daulat, jise us ká málik apne nuqsán ke liye rakh chhoṛtá hai;

14aur wuh mál kisí bure hádise se barbád hotá hai; aur agar us ke ghar meṉ beṭá paidá hotá hai, to us waqt us ke háth meṉ kuchh nahíṉ hotá.

15Jis tarah se wuh apní máṉ ke peṭ se niklá, usí tarah naṉgá, jaisá ki áyá thá, phir jáegá; aur apní mihnat kí ujrat meṉ kuchh na páegá, jise wuh apne háth meṉ le jáe.

16Aur yih bhí balá e ‘azím hai, ki ṭhík, jaisá wuh áyá thá, waisá hí jáegá; aur use is fuzúl mihnat se kyá hásil hai?

17Wuh ‘umr bhar bechainí meṉ khátá hai, aur us kí diqqdárí aur bezárí aur ḳhafagí kí intihá nahíṉ.

18Lo, maiṉ ne dekhá, ki yih ḳhúb hai, balki ḳhushnumá hai, ki ádmí kháe, aur piye, aur apní sárí mihnat se, jo wuh dunyá meṉ kartá hai, apní tamám ‘umr, jo Ḳhudá ne use baḳhshí hai, ráhat uṭháe: kyúṉki us ká baḳhra yihí hai.

19Níz har ek ádmí, jise Ḳhudá ne mál o asbáb baḳhshá, aur use taufíq dí ki us meṉ se kháe, aur apná baḳhra le, aur apní mihnat se shádmán rahe; yih to Ḳhudá kí baḳhshish hai.

20Pas wuh apní zindagí ke dinoṉ ko bahut yád na karegá; is liye ki Ḳhudá us kí ḳhushdilí ke mutábiq us se sulúk kartá hai.

← Chapter 4 Jump to: Chapter 6 →