Ecclesiastes 4

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 3 Jump to: Chapter 5 →

1Tab maiṉ ne phirkar us tamám zulm par jo dunyá meṉ hotá hai nazar kí, aur mazlúmoṉ ke áṉsúoṉ ko dekhá, aur un ko tasallí denewálá koí na thá; aur un par zulm karnewále zabardast the, par un ko tasallí denewálá koí na thá.

2Pas maiṉ ne murdoṉ ko, jo áge mar chuke, un zindoṉ se jo ab jíte haiṉ ziyáda mubárak jáná.

3Balki donoṉ se nekbaḳht wuh hai jo ab tak húá hí nahíṉ; jis ne wuh buráí jo dunyá meṉ hotí hai nahíṉ dekhí.

4Phir maiṉ ne sárí mihnat ke kám aur har ek achchhí dastkárí ko dekhá, ki is ke sabab se ádmí apne hamsáye se hasad kartá hai. Yih bhí butlán aur hawá kí charán hai.

5Bedánish apne háth sameṭtá hai aur áp hí apná gosht khátá hai.

6Ek muṭṭhí bhar jo chain ke sáth ho, un do muṭṭhiyoṉ se bihtar hai, jin ke sáth mihnat aur hawá kí charán ho.

7Aur maiṉ ne phirkar dunyá ke butlán ko dekhá.

8Koí akelá hai aur us ke sáth koí dúsrá nahíṉ; us ke na betá hai, na bháí, taubhí us kí sárí mihnat kí intihá nahíṉ, aur us kí áṉkh daulat se ser nahíṉ hotí. Wuh kahtá hai, Maiṉ kis ke liye mihnat kartá, aur apní ján ko ‘aish se mahrúm rakhtá húṉ? Yih bhí butlán hai, háṉ, yih saḳht dukh hai.

9Ek se do bihtar haiṉ; kyúṉki un kí mihnat se un ko baṛá fáida hotá hai.

10Kyúṉki agar wuh gireṉ, to ek apne sáthí ko uṭháegá; lekin us par afsos jo akelá hai jab wuh girtá hai; kyúṉki koí dúsrá nahíṉ jo use uṭhá khaṛá kare.

11Phir agar do ikaṭṭhe leṭeṉ, to garm hote haiṉ: par akelá kyúṉkar garm ko saktá hai?

12Aur agar koí ek par g̣álib ho, to do us ká sámná kar sakte haiṉ; aur tihrí ḍorí jald nahíṉ ṭúṭtí.

13Miskín aur dánishmand laṛká us búṛhe bewuqúf bádsháh se, jis ne nasíhat sunná tark kar diyá, bihtar hai.

14Kyúṉki wuh qaidḳháne se nikalkar bádsháhí karne áyá, báwujúde ki wuh jo saltanat hí meṉ paidá húá, miskín ho chalá.

15Maiṉ ne sab zindoṉ ko, jo dunyá meṉ chalte phirte haiṉ, dekhá, ki wuh us dúsre jawán ke sáth the, jo us ká jánishín hone ke liye barpá húá.

16Un sab logoṉ ká, ya‘ní un sab ká jin par wuh hukmrán thá, kuchh shumár na thá; taubhí wuh jo us ke ba‘d uṭheṉge us se ḳhush na hoṉge. Yaqínan yih bhí butlán aur hawá kí charán hai.

← Chapter 3 Jump to: Chapter 5 →