Leviticus 2

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 1 Jump to: Chapter 3 →

1Aur agar koí Ḳhudáwand ke liye nazr kí qurbání ká chaṛháwá láe, to apne chaṛháwe ke liye maida le, aur us meṉ tel ḍálkar us ke úpar lubán rakkhe;

2aur wuh use Hárún ke beṭoṉ ke pás, jo káhin haiṉ, láe, aur tel mile húe maide meṉ se is tarah apní muṭṭhí bharkar nikále ki sab lubán us meṉ á jáe; tab káhin use nazr kí qurbání kí yádgárí ke taur par mazbah ke úpar jaláe. Yih Ḳhudáwand ke liye ráhatangez ḳhushbú kí átashín qurbání hogí.

3Aur jo kuchh us nazr kí qurbání meṉ se báqí rah jáe, wuh Hárún aur us ke beṭoṉ ká hogá. Yih Ḳhudáwand kí átashín qurbáníoṉ meṉ páktarín chíz hai.

4Aur jab tú tanúr ká paká húá nazr kí qurbání ká chaṛháwá láe, to wuh tel mile húe maide ke beḳhamírí girde, yá tel chupṛí húí beḳhamírí chapátiyáṉ hoṉ.

5Aur agar terí nazr kí qurbání ká chaṛháwá tawe ká paká húá ho, to wuh tel mile húe beḳhamírí maide ká ho.

6Us ko ṭukṛe ṭukṛe karke us par tel ḍálná, to wuh nazr kí qurbání hogí.

7Aur agar terí nazr kí qurbání ká chaṛháwá kaṛáhí ká talá húá ho, to wuh maide se tel meṉ banáyá jáe.

8Tú in chízoṉ kí nazr kí qurbání ká chaṛháwá Ḳhudáwand ke pás láná; wuh káhin ko diyá jáe, aur wuh use mazbah ke pás láe.

9Aur káhin us nazr kí qurbání meṉ se us kí yádgárí ká hissa uṭhákar mazbah par jaláe. Yih Ḳhudáwand ke liye ráhatangez ḳhushbú kí átashín qurbání hogí.

10Aur jo kuchh us nazr kí qurbání meṉ se bach rahe, wuh Hárún aur us ke beṭoṉ ká hogá. Yih Ḳhudáwand kí átashín qurbáníoṉ meṉ páktarín chíz hai.

11Koí nazr kí qurbání, jo tum Ḳhudáwand ke huzúr chaṛháo, wuh ḳhamír milákar na banáí jáe; tum kabhí átashín qurbání ke taur par Ḳhudáwand ke huzúr ḳhamír yá shahd na jaláná.

12Tum in ko pahle phaloṉ ke chaṛháwe ke taur par Ḳhudáwand ke huzúr láná; par ráhatangez ḳhushbú ke liye wuh mazbah par ná chaṛháe jáeṉ.

13Aur tú apní nazr kí qurbání ke har chaṛháwe ko namkín banáná; aur apní kisí nazr kí qurbání ko apne Ḳhudá ke ‘ahd ke namak bag̣air na rahne dená: apne sab chaṛháwoṉ ke sáth namak bhí chaṛháná.

14Aur agar tú pahle phaloṉ kí nazr ká chaṛháwá Ḳhudáwand ke huzúr chaṛháe, to apne pahle phaloṉ kí nazr ke chaṛháwe ke liye anáj kí bhuní húí báleṉ, ya‘ní harí harí báloṉ meṉ se háth se malkar nikále húe anáj ko chaṛháná,

15aur us meṉ tel ḍálná, aur us ke úpar lubán rakhná, to wuh nazr kí qurbání hogí.

16Aur káhin us kí yádgárí ke hisse ko, ya‘ní thoṛe se malkar nikále húe dánoṉ ko, aur thoṛe se tel ko, aur sáre lubán ko jalá de. Yih Ḳhudáwand ke liye átashín qurbání hogí.

← Chapter 1 Jump to: Chapter 3 →