Leviticus 27

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 26 Jump to:

1Phir Ḳhudáwand ne Músá se kahá, ki

2Baní Isráíl se kah, ki Jab koí shaḳhs apní mannat púrí karne lage, to mannat ke ádmí tere qímat ṭhahráne ke muwáfiq Ḳhudáwand ke hoṉge.

3So bís baras kí ‘umr se lekar sáṭh baras kí ‘umr tak ke mard ke liye terí ṭhahráí húí qímat maqdis kí misqál ke hisáb se chándí kí pachás misqál hoṉ.

4Aur agar wuh ‘aurat ho, to terí ṭhahráí huí qímat tís misqál hoṉ.

5Aur agar páṉch baras se lekar bís baras tak kí ‘umr ho, to terí ṭhahráí húí qímat mard ke liye bís misqál, aur ‘aurat ke liye das misqál hoṉ.

6Par agar ‘umr ek mahíne se lekar páṉch baras tak kí ho, to laṛke ke liye chándí kí páṉch misqál, aur laṛkí ke liye chándí kí tín misqál ṭhahráí jáeṉ.

7Aur agar sáṭh baras se lekar úpar úpar kí ‘umr ho, to mard ke liye pandrah misqál, aur ‘aurat ke liye das misqál muqarrar hoṉ.

8Par agar koí tere andáze kí nisbat kam maqdúr rakhtá ho, to wuh káhin ke sámne házir kiyá jáe, aur káhin us kí qímat ṭhahráe; ya‘ní jis shaḳhs ne mannat mání hai, us kí jaisí haisíyat ho waisí hí qímat káhin us ke liye ṭhahráe.

9Aur agar wuh mannat kisí aise jánwar kí hai, jis kí qurbání log Ḳhudáwand ke huzúr chaṛháyá karte haiṉ, to jo jánwar koí Ḳhudáwand kí nazr kare wuh pák ṭhahregá.

10Wuh use phir kisí tarah na badle, na to achchhe ke ‘iwaz burá de, aur na bure ke ‘iwaz achchhá de: aur agar wuh kisí hál meṉ ek jánwar ke badle dúsrá jánwar de, to wuh aur us ká badal donoṉ pák ṭhahreṉge.

11Aur agar wuh koí nápák jánwar ho, jis kí qurbání Ḳhudáwand ke huzúr nahíṉ guzránte, to wuh use káhin ke sámne khaṛá kare,

12aur ḳhwáh wuh achchhá ho yá burá, káhin us kí qímat ṭhahráe; aur ai káhin, jo kuchh tú us ká dám ṭhahráegá, wuhí rahegá.

13Aur agar wuh cháhe ki us ká fidya dekar use chhuṛáe, to jo qímat tú ne ṭhahráí hai, us meṉ us ká páṉchwáṉ hissa wuh âur milákar de.

14Aur agar koí apne ghar ko muqaddas qarár de, táki wuh Ḳhudáwand ke liye pák ho, to ḳhwáh wuh achchhá ho yá burá, káhin us kí qímat ṭhahráe, aur jo kuchh wuh ṭhahráe, wuhí us kí qímat rahegí.

15Aur jis ne us ghar ko muqaddas qarár diyá hai, agar wuh cháhe ki ghar ká fidya dekar use chhuṛáe, to terí ṭhahráí húí qímat meṉ us ká páṉchwáṉ hissa âur milákar de, tab wuh ghar usí ká rahegá.

16Aur agar koí shaḳhs apne maurúsí khet ká koí hissa Ḳhudáwand ke liye muqaddas qarár de, to tú qímat ká andáza karte waqt yih dekhná ki us meṉ kitná bíj boyá jáegá. Jitní zamín meṉ ek ḳhomar ke wazn ke barábar jau bo sakeṉ, us kí qímat chándí kí pachás misqál ho.

17Agar koí sál i yobalí se apná khet muqaddas qarár de, to us kí qímat, jo tú ṭhahráe, wuhí rahegí.

18Par agar wuh sál i yobalí ke ba‘d apne khet ko muqaddas qarár de, to jitne baras dúsre sál i yobalí ke báqí hoṉ, un hí ke mutábiq káhin us ke liye rupaye ká hisáb kare; aur jitná hisáb meṉ áe, utná terí ṭhahráí húí qímat se kam kiyá jáe.

19Aur agar wuh, jis ne us khet ko muqaddas qarár diyá hai, yih cháhe ki us ká fidya dekar use chhuṛáe, to wuh terí ṭhahráí húí qímat ká páṉchwáṉ hissa us ke sáth âur milákar de, to wuh khet usí ká rahegá.

20Aur agar wuh us khet ká fidya dekar use na chhuṛáe, yá kisí dúsre shaḳhs ke háth use bech de, to phir wuh khet kabhí na chhuṛáyá jáe;

21balki wuh khet jab sál i yobalí meṉ chhúṭe, to waqf kiye húe khet kí tarah wuh Ḳhudáwand ke liye muqaddas hogá, aur káhin kí milkíyat ṭhahregá.

22Aur agar koí shaḳhs kisí ḳharíde húe khet ko jo us ká maurúsí nahíṉ Ḳhudáwand ke liye muqaddas qarár de;

23to káhin jitne baras dúsre sál i yobalí ke báqí hoṉ, un ke mutábiq terí ṭhahráí húí qímat ká hisáb us ke liye kare, aur wuh usí din terí ṭhahráí húí qímat ko Ḳhudáwand ke liye muqaddas jánkar de de.

24Aur sál i yobalí meṉ wuh khet usí ko wápas ho jáe jis se wuh ḳharídá gayá thá aur jis kí wuh milkíyat hai.

25Aur tere sáre qímat ke andáze maqdis kí misqál ke hisáb se hoṉ; aur ek misqál bís jíráh ká ho.

26Par faqat chaupáyoṉ ke pahlauṭhoṉ ko, jo pahlauṭhe hone kí wajh se Ḳhudáwand ke ṭhahar chuke haiṉ, koí shaḳhs muqaddas qarár na de, ḳhwáh wuh bail ho yá bheṛ bakrí: wuh to Ḳhudáwand hí ká hai.

27Par agar wuh kisí nápák jánwar ká pahlauṭhá ho, to wuh shaḳhs terí ṭhahráí húí qímat ká páṉchwáṉ hissa qímat meṉ âur milákar us ká fidya de, aur use chhuṛáe; aur agar us ká fidya na diyá jáe, to wuh terí ṭhahráí húí qímat par bechá jáe.

28Taubhí koí maḳhsús kí húí chíz, jise koí shaḳhs apne sáre mál meṉ se Ḳhudáwand ke liye maḳhsús kare, ḳhwáh wuh us ká ádmí yá jánwar, yá maurúsí zamín ho, bechí na jáe, aur na us ká fidya diyá jáe; har ek maḳhsús kí húí chíz Ḳhudáwand ke liye niháyat pák hai.

29Agar ádmíoṉ meṉ se koí maḳhsús kiyá jáe, to us ká fidya na diyá jáe; wuh zarúr ján se márá jáe.

30Aur zamín kí paidáwár kí sárí dahyakí, ḳhwáh wuh zamín ke bíj kí yá daraḳht ke phal kí ho, Ḳhudáwand kí hai, aur wuh Ḳhudáwand ke liye pák hai.

31Aur agar koí apní dahyakí meṉ se kuchh chhuṛáná cháhe, to wuh us ká páṉchwáṉ hissa us meṉ âur milákar use chhuṛáe.

32Aur gáe bail, aur bheṛ bakrí, yá jo jánwar charwáhe kí láṭhí ke níche se guzartá ho, un kí dahyakí, ya‘ní das píchhe ek ek jánwar, Ḳhudáwand ke liye pák ṭhahre.

33Koí us kí dekh bhál na kare ki wuh achchhá hai yá burá hai, aur na use badle; aur agar kahíṉ koí use badle, to wuh asl aur badal donoṉ ke donoṉ muqaddas ṭhahreṉ, aur us ká fidya bhí na diyá jáe.

34Jo ahkám Ḳhudáwand ne koh i Síná par baní Isráíl ke liye Músá ko diye, wuh yihí haiṉ.

← Chapter 26 Jump to: