Leviticus 3

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 2 Jump to: Chapter 4 →

1Aur agar us ká chaṛháwá salámatí ká zabíha ho, aur wuh gáe bail meṉ se kisí ko chaṛháe, to ḳhwáh wuh nar ho yá máda, par jo be‘aib ho, usí ko wuh Ḳhudáwand ke huzúr chaṛháe.

2Aur wuh apná háth apne chaṛháwe ke jánwar ke sir par rakkhe, aur ḳhaima e ijtimá‘ ke darwáze par use zabh kare, aur Hárún ke beṭe, jo káhin haiṉ, us ke ḳhún ko mazbah par girdágird chhiṛkeṉ.

3Aur wuh salámatí ke zabíhe meṉ se Ḳhudáwand ke liye átashín qurbání guzráne, ya‘ní jis charbí se antṛiyáṉ ḍhakí rahtí haiṉ,

4aur wuh sárí charbí jo antṛiyoṉ par lipṭí rahtí hai, aur donoṉ gurde aur un ke úpar kí charbí jo kamar ke pás rahtí hai, aur jigar par kí jhillí gurdoṉ samet, in sabhoṉ ko wuh judá kare,

5aur Hárún ke beṭe unheṉ mazbah par soḳhtaní qurbání ke úpar jaláeṉ, jo un lakṛiyoṉ par hogí jo ág ke úpar haiṉ. Yih Ḳhudáwand ke liye ráhatangez ḳhushbú kí átashín qurbání hai.

6Aur agar us ká salámatí ke zabíhe ká chaṛháwá Ḳhudáwand ke liye bheṛ bakrí meṉ se ho, to ḳhwáh wuh nar ho yá máda, par jo be‘aib ho, usí ko wuh chaṛháe.

7Agar wuh barra chaṛhátá ho, to use Ḳhudáwand ke huzúr chaṛháe;

8aur apná háth apne chaṛháwe ke jánwar ke sir par rakkhe, aur use khaima e ijtimá‘ ke sámne zabh kare; aur Hárún ke beṭe us ke ḳhún ko mazbah par girdágird chhiṛkeṉ.

9Aur wuh salámatí ke zabíhe meṉ se Ḳhudáwand ke liye átashín qurbání guzráne; ya‘ní us kí púrí charbí bharí dum ko wuh ríṛh ke pás se alag kare, aur jis charbí se antṛiyáṉ ḍhakí rahtí haiṉ, aur wuh sárí charbí jo antṛiyoṉ par lipṭí rahtí hai,

10aur donoṉ gurde, aur un ke úpar kí charbí jo kamar ke pás rahtí hai, aur jigar par kí jhillí gurdoṉ samet, in sabhoṉ ko wuh alag kare;

11aur káhin inheṉ mazbah par jaláe. Yih us átashín qurbání kí g̣izá hai, jo Ḳhudáwand ko guzrání játí hai.

12Aur agar wuh bakrá yá bakrí chaṛhátá ho, to use Ḳhudáwand ke huzúr chaṛháe:

13aur wuh apná háth us ke sir par rakkhe, aur use ḳhaima e ijtimá‘ ke sámne zabh kare; aur Hárún ke beṭe us ke ḳhún ko mazbah par girdágird chhiṛkeṉ:

14aur wuh us meṉ se apná chaṛháwá átashín qurbání ke taur par Ḳhudáwand ke huzúr guzráne; ya‘ní jis charbí se antṛiyáṉ ḍhakí rahtí haiṉ, aur wuh sab charbí jo antṛiyoṉ par lipṭí rahtí hai,

15aur donoṉ gurde, aur un ke úpar kí charbí jo kamar ke pás rahtí hai, aur jigar par kí jhillí gurdoṉ samet, in sabhoṉ ko wuh alag kare,

16aur káhin inheṉ mazbah par jaláe; yih us átashín qurbání kí g̣izá hai, jo ráhatangez ḳhushbú ke liye hotí hai. Sárí charbí Ḳhudáwand kí hai.

17Yih tumhárí sab sukúnatgáhoṉ meṉ nasl dar nasl ek dáimí qánún rahegá, ki tum charbí yá ḳhún mutlaq na kháo.

← Chapter 2 Jump to: Chapter 4 →