Song of Solomon 2

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 1 Jump to: Chapter 3 →

1Maiṉ Shárún kí nargis, Aur wádíoṉ kí sosan húṉ.

2Jaisí sosan jháṛiyoṉ meṉ, Waisí hí merí mahbúba kuṉwáriyoṉ meṉ hai.

3Jaisá seb ká daraḳht ban ke daraḳhtoṉ meṉ, Waisá hí merá mahbúb naujawánoṉ meṉ hai. Maiṉ niháyat shádmání se us ke sáye meṉ baiṭhí, Aur us ká phal mere muṉh meṉ míṭhá lagá.

4Wuh mujhe maiḳháne ke andar láyá, Aur us kí mahabbat ká jhanḍá mere úpar thá.

5Kishmish se mujhe qarár do, seboṉ se mujhe tázadam karo, Kyúṉki maiṉ ‘ishq kí bímár húṉ.

6Us ká báyáṉ háth mere sir ke níche hai, Aur us ká dahiná háth mujhe gale se lagátá hai.

7Ai Yarúshalem kí beṭiyo, Maiṉ tum ko g̣azáloṉ aur maidán kí harniyoṉ kí qasam detí húṉ, Ki tum mere piyáre ko na jagáo, na uṭháo, Jab tak ki wuh uṭhná na cháhe.

8Mere mahbúb kí áwáz! dekh, wuh á rahá hai; Paháṛoṉ par se kúdtá, aur ṭíloṉ par se pháṉdtá húá chalá átá hai.

9Merá mahbúb áhú yá jawán haran kí mánind hai: Dekh, wuh hamárí díwár ke píchhe khaṛá hai, Wuh khiṛkiyoṉ se jháṉktá hai, Wuh jhanjhriyoṉ se táktá hai.

10Mere mahbúb ne mujh se báteṉ kíṉ, aur kahá, Uṭh, merí piyárí, merí náznín, chalí á;

11Kyúṉki dekh, jáṛá guzar gayá, Meṉh baras chuká, aur nikal gayá;

12Zamín par phúloṉ kí bahár hai, Parandoṉ ke chahchaháne ká waqt á pahuṉchá, Aur hamárí sarzamín meṉ qumríoṉ kí áwáz sunáí dene lagí;

13Anjír ke daraḳhtoṉ meṉ hare anjír pakne lage, Aur tákeṉ phúlne lagíṉ, Un kí mahak phail rahí hai. So uṭh, merí piyárí, merí jamíla, chalí á.

14Ai merí kabútarí, jo chaṭánoṉ ke daráṛoṉ meṉ, aur kaṛáṛoṉ kí áṛ meṉ chhipí hai, Mujhe apná chihra dikhá, mujhe apní áwáz suná; Kyúṉki tú máhjabín, aur terí áwáz shírín hai.

15Hamáre liye lomṛiyoṉ ko pakṛo, un lomṛí bachchoṉ ko, jo tákistán ḳharáb karte haiṉ; Kyúṉki hamárí tákoṉ meṉ phúl lage haiṉ.

16Merá mahbúb merá hai, aur maiṉ us kí húṉ; Wuh sosanoṉ ke darmiyán charátá hai.

17Jab tak din ḍhale, aur sáya baṛhe, Tú phir á, ai mere mahbúb; tú g̣azál yá jawán haran kí tarah hokar á, Jo Bátar ke paháṛoṉ par hai.

← Chapter 1 Jump to: Chapter 3 →