Song of Solomon 4

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 3 Jump to: Chapter 5 →

1Dekh, tú ḳhúbrú hai, ai merí piyárí; dekh, tú ḳhúbsúrat hai; Terí áṉkheṉ tere niqáb ke níche do kabútar haiṉ; Tere bál bakriyoṉ ke galle kí mánind haiṉ, Jo koh i Jili‘ád par baiṭhí hoṉ.

2Tere dáṉt bheṛoṉ ke galle kí mánind haiṉ, Jin ke bál katre gaye hoṉ, aur jin ko g̣usl diyá gayá ho; Jin meṉ se har ek ne do bachche diye hoṉ, Aur un meṉ ek bhí báṉjh na ho.

3Tere hoṉṭh qirmizí ḍore haiṉ, Terá muṉh dilfareb hai; Terí kanpaṭiyáṉ tere niqáb ke níche Anár ke ṭukṛoṉ kí mánind haiṉ.

4Terí gardan Dáúd ká burj hai, jo siláhḳháne ke liye baná, Jis par hazár sipareṉ laṭkáí gayí haiṉ, Wuh sab kí sab pahlawánoṉ kí sipareṉ haiṉ.

5Terí donoṉ chhátiyáṉ do tawám áhú bachche haiṉ, Jo sosanoṉ meṉ charte haiṉ.

6Jab tak din ḍhale, aur sáya baṛhe, Maiṉ murr ke paháṛ aur lubán ke ṭíle par já rahúṉgá.

7Ai merí piyárí, tú sarápá jamíl hai; Tujh meṉ koí ‘aib nahíṉ.

8Lubnán se mere sáth, ai dulhan, Tú Lubnán se mere sáth chalí á; Amána kí choṭí par se, Sanír aur Harmún kí choṭí par se, Sheroṉ kí máṉdoṉ se, Aur chítoṉ ke paháṛoṉ par se nazar dauṛá.

9Ai merí piyárí, merí zauja, tú ne merá dil lúṭ liyá; Apní ek nazar se, apní gardan ke ek tauq se, Tú ne merá dil g̣árat kar liyá.

10Ai merí piyárí, merí zauja, terá ‘ishq kyá ḳhúb hai! Terí mahabbat mai se ziyáda lazíz hai! Aur tere ‘itroṉ kí mahak har tarah kí ḳhushbú se baṛhkar hai.

11Ai merí zauja, tere hoṉṭhoṉ se shahd ṭapaktá hai; Shahd o shír terí zabán tale haiṉ; Terí poshák kí ḳhushbú Lubnán kí sí hai.

12Merí piyárí, merí zauja ek muqaffal bág̣ícha hai; Wuh mahfúz sotá aur sarbamuhr chashma hai.

13Tere bág̣ ke paude lazíz mewadár anár haiṉ; Mehṉdí aur sumbul bhí haiṉ,

14Jaṭámásí aur za‘farán, Bedmushk aur dárchíní, aur lubán ke tamám daraḳht, Murr aur ‘úd aur har tarah kí ḳháss ḳhushbú.

15Tú bág̣oṉ meṉ ek mamba‘, Áb i hayát ká chashma, Aur Lubnán ká jharná hai.

16Ai bád i shimál, bedár ho, ai bád i junúb, chalí á; Mere bág̣ par se guzar, táki us kí ḳhushbú phaile. Merá mahbúb apne bág̣ meṉ áe, Aur apne lazíz mewe ḳháe.

← Chapter 3 Jump to: Chapter 5 →