1 Corinthians 5

Tshivenda (BIVHILI KHETHWA Mafhungo Madifha)

← Chapter 4 Jump to: Chapter 6 →

1Ndi ṱolou pfa phungo ya vhuṱudzi vhune ha khou itwa ngeo, vhune na kha vhannḓa vhu si anzele u wanala, henefho hune muthu a farakana na musadzi wa khotsi awe.

2Ni tshi khou ita zwenezwo na dovha na huduluwa? A si khwiṋe ni tshi ṱungufhala na fhedza nga u tumula muiti wazwo tshivhidzoni?

3Nṋe naho ndi kule na inwi, hone lwa muya ndi na inwi henefho. Na u haṱula ndo no a haṱula hayo a hoyo a itaho zwenezwo zwingafho, nda nga ndi na inwi henefho,

4ndi ri: Nṋe na inwi ri ḓo kuvhangana lwa muya nga dzina ḽa Muṋe washu Yesu, uyo muthu ra mu kumedza Saṱhane nga maanḓa a Muṋe washu Yesu, uri tsiko yawe mmbi i fheliswe, muya wawe u kone u tshidzwa nga ḓuvha ḽa khaṱhulo ya Muṋe washu.

6Honoho u zuwa haṋu a si havhuḓi. A ni zwi ḓivhi uri mbilisa ṱhukhu-ṱhukhu i a dungisa khali yoṱhe naa?

7Kokotani-ha mbilisa ndala ya vhutshinyi uri ni vhe bwindi ḽiswa ḽi si na ludungela lwa vhutshinyi. Ndi zwenezwo zwine na vha zwone, vhunga na Ngwana yashu ya Paseka yo no ḓi ṱhavhiwa, ndi amba Ene Khristo.

8Zwino kha ri dzhene-ha vhuṱamboni ri si na mbilisa ndala iḽa ya vhunwa na vhuvhi; ri ḽe vhurotho vhu si na mbilisa, vhune ha sumbedza u sa hoya na ngoho.

9Ndo no ḓi ni ṅwalela uri ni si konane na dziphombwe.

10Ndi tshi ralo ndo vha ndi sa ambi vhannḓa vha re dziphombwe kana vha funesaho lupfumo kana mafobvu kana vha rerelelaho midzimu; aiwa, zwó ralo ni vho ḓo tou nga ni sa pfuluwa tshoṱhe shangoni.

11Zwe nda vha ndi tshi khou amba zwone ndi uri ni songo konana na muthu ane a pfi mutendi ngeno e phombwe kana a tshi funesa lupfumo kana a tshi rerelela midzimu kana a tshi sasaladza vhaṅwe kana tshidakwa kana fobvu – muthu o raloho ni songo vhuya na ḽa nae.

12U haṱula vhannḓa hufha u si mushumo wanga. Vhone vha ḓo haṱulwa nga Mudzimu. Tshaṋu a si u haṱula miraḓo ya tshivhidzo kani? Hu pfi, “Muthu muvhi kha a tumulwe a si tsha vha muṅwe waṋu!”

← Chapter 4 Jump to: Chapter 6 →