1 Chronicles 15

Waray

← Chapter 14 Jump to: Chapter 16 →

1Para han iya kalugaringon nga paggamit, nagtindog hin mga balay hi David didto han Syudad ni David. Nag-andam liwat hiya hin dapit nga bubutangan han Kahon han Ginsaaran ngan nagtukod hiya hin tulda para han Kahon han Ginsaaran.

2Niyan, nagsiring hiya, “An mga Levita la an makakadara han Kahon han Ginsaaran kay hira man an gintudlok han Ginoo hin pagdara hini ug hin pag-alagad ha iya ha kadayonan.”

3Sanglit gintawag ni David an ngatanan nga mga tawo han Israel ngadto ha Jerusalem basi madara an Kahon han Ginsaaran ngadto han iya gin-andam nga dapit.

4Kasunod, ginpasugoan niya an mga tulin ni Aaron ug an mga Levita.

5Tikang han Levita nga banay ni Cohat, inmabot hi Uriel nga tinaporan hin 120 nga sakop han iya banay;

6tikang han banay ni Merari, inmabot hi Asaya nga tinaporan hin 220 nga sakop han iya banay;

7tikang han banay ni Gerson, inmabot hi Joel nga tinaporan hin 130 nga sakop han iya banay;

8tikang han banay ni Elisafan, inmabot hi Semeias nga tinaporan hin 200 nga sakop han iya banay;

9tikang han banay ni Hebron, inmabot hi Eliel nga tinaporan hin 80 nga sakop han iya banay;

10ug tikang han banay ni Oziel, inmabot hi Abinadab nga tinaporan hin 112 nga sakop han iya banay.

11Niyan gintawag ni David an duha nga mga padi, hira Sadoc ug Abiatar ngan han unom nga mga Levita, hira Uriel, Asaya, Joel, Semeya, Eliel, ug Aminadab.

12Ginsiring niya an mga Levita, “Mga pangulo kamo han mga Levita nga banay. Paglinis kamo han iyo kalugaringon ug linisi liwat an iyo igkasi Levita basi kamo an magdara han Kahon han Ginsaaran han Ginoo nga Dyos han Israel ngadto han dapit nga gin-andam nga bubutangan han Kahon han Ginsaaran.

13Tungod kay waray man kamo didto han syahan nga pagdara hini, ginkastigo kita han Ginoo nga Dyos kay waray man kita maghatag han angay nga pagsingba ha iya.”

14Niyan an mga padi ug an mga Levita naglinis han ira kalugaringon basi hira an magdara han Kahon han Ginsaaran han Ginoo nga Dyos han Israel.

15Ginpasag an Kahon han Ginsaaran han mga Levita sumala han sugo han Ginoo kan Moises.

16Ginsugo ni David an mga pangulo han mga Levita hin pagpili hin mga Levita nga magkakanta ug magtotokar han mga arpa ug gimbal.

17Tikang han mga banay han mga parakanta, napili inin masunod nga magtotokar han gimbal: hi Heman nga anak ni Joel, an iya uropod nga hi Asaf nga anak ni Baraquias;

18ug hi Etan nga anak ni Casaya, han banay ni Merari. Para hin pagsabay ha ira, ginpili inin masunod nga mga Levita hin pagtokar han tipli nga mga arpa: hira Zacarias,

19Jasiel, Semiramot, Jahiel, Ani, Eliab, Banaias, ug Maasias.

20Para han pagtokar han garhob nga mga arpa ginpili nira inin masunod nga mga Levita:

21hira Matatias, Elifalu, Macenias, Asasias, ug an mga gwardya han Templo, amo hira Obed Edom ug Jahiel.

22Tungod kay batid hin musika hi Conenias ginpili hiya nira nga tinaporan han mga parakanta nga mga Levita;

23Hira Baraquias ug Elcana, upod hira Obed Edom ug Jehias amo an napili nga mga magbarantay han Kahon han Ginsaaran.

24An mga kapadian hira Sebenias, Josafat, Natanael, Amasai, Zacarias, Banaias, ug Elieser amo an napili hin pagpatunog han mga trompeta ha atubangan han Kahon han Ginsaaran.

25Sanglit hira David, an mga pangulo han Israel, ug an mga opisyales han kasondalohan kinmadto han balay ni Obed Edom hin pagkuha han Kahon han Ginsaaran ngan nagkamay-ada hira hin maribhong nga pagsaurog.

26Naghalad hira hin pito nga todo nga baka, pito nga karnero kay waray nira pagruhaduha nga bubuligan hira han Ginoo hin pagdara han Kahon han Ginsaaran.

27Nakakasul-ot hi David han gimamaupayi nga lino, sugad man an mga parakanta, hi Conenias nga ira tinaporan, ngan an mga Levita nga nagdadara han Kahon. Nakakasul-ot liwat han efod hi David.

28Ginbunyogan han ngatanan nga mga Israelita an Kahon han Ginsaaran ngadto ha Jerusalem ngan dida ha dalan naggogliat hira hin kalipay, nagpatunog han mga trompeta, mga budyong, ug mga gimbal ngan nagtokar han mga arpa.

29Samtang gindara an Kahon ngadto ha syudad, hi Mical, an anak nga babaye ni Saul, tinmangbo ha bentana ngan kinmita kan David nga nagsisinayaw ngan naambak tugob hin kalipay ngan nakuhaan hi Mical hin gana kan David.

← Chapter 14 Jump to: Chapter 16 →