1 Kings 21

Waray

← Chapter 20 Jump to: Chapter 22 →

1Hirani han palasyo ni Hadi Acab didto ha Jezrael may-ada usa nga urubasan nga gintag-iya hin usa ka tawo nga ginngaranan kan Nabot.

2Usa ka adlaw nagsiring kan Nabot hi Acab, “Ighatag ha akon an imo urubasan; sapit la ito han akon palasyo, ngan karuyag ko gamiton an tuna nga tanaman hin mga utanon. Tatagan ko ikaw hin mauruupay nga urubasan, o kon karuyag mo, papaliton ko hin maupay nga prisyo.”

3Binmaton hi Nabot, “Sinunod ko ini nga urubasan tikang han akon kaapoy-apoyan. Diri unta itugot han Ginoo nga ighatag ko ha imo an akon malon han akon kaapoy-apoyan.”

4Inmoli hi Acab nga mabidoon ngan nasisina tungod han iginsiring ha iya ni Nabot. Hinmigda hiya nga naatubang han bungbong, ngan dinmiri hiya hin pagkaon.

5Dinmaop ha iya hi Jezebel nga iya asawa ngan nagpakiana, “Kay ano nga mabidoon ka? Kay ano nga diri ka nakaon?”

6Binmaton hiya, “Tungod han iginsiring ha akon ni Nabot. Ginhangyo ko hin pagpalit an iya urubasan, o kon karuyag niya, babalyoan ko hiya hin iba, kundi nagsiring hiya nga diri ko matatag-iya ito nga iya urubasan!”

7Binmaton hi Jezebel, “Oy, diri ba ikaw amo an hadi? Buhat, pagkalipay ngan kaon. Kukuhaon ko para ha imo an urubasan ni Nabot!”

8Niyan nagsurat hi Jezebel hin mga surat, ginpirmahan ini han ngaran ni Acab, ginsilyohan han silyo han hadi, ngan ginpadara ha mga opisyal ngan dumagko nga mga tuminungnong han Jezrael.

9Nagsiring an mga sinurat: “Igsangyaw in usa ka adlaw nga pagpuasa, tiroka an mga tawo, ngan pasidunggi hi Nabot.

10Kuha hin duha nga mga bugoy nga magsusumbong ha iya hiunong hin pagpakaraot han Dyos ngan han hadi. Katapos dad-a hiya ha gawas han syudad ngan batoa hiya ngada han kamatay.”

11Ginbuhat han mga opisyal ngan han mga dumagko nga mga tuminungnong han Jezrael an iginsugo ni Jezebel.

12Ginsangyaw nira in usa ka adlaw nga pagpuasa, gintirok an mga tawo, ngan ginpasidunggan hi Nabot.

13Iginsumbong hiya ha kadam-an han duha nga mga bugoy hiunong hin pagpakaraot han Dyos ngan han dadi, sanglit gindara hiya ha gawas han syudad ngan ginbato ngada han kamatay.

14Ginpasumatan nira hi Jezebel nga patay na hi Nabot.

15Han pakabati la hini ni Jezebel, nagsiring hiya kan Acab, “Patay na hi Nabot. Kadto na ngan pagtag-iyaha an urubasan nga waray niya igbaligya ha imo.”

16Kinmadto dayon hi Acab hin pagtag-iya han urubasan.

17Niyan nagsiring an Ginoo kan Elias nga manaragna nga taga-Tisbe,

18“Kadtoa hi Hadi Acab han Samaria. Hiaagian mo hiya didto han urubasan ni Nabot, nga iya na gintatag-iya.

19Sumati hiya nga nasiring ha iya ako nga Ginoo, ‘Katapos mo pagpataya han tawo, kukuhaon mo ba liwat an iya tuna?’ Sumati hiya nga amo ini an akon isinisiring, ‘Dida gud han dapit nga ginlaklakan han mga ayam han dugo ni Nabot, paglalaklakon man nira an imo dugo!’”

20Han paghikit-i la ni Acab kan Elias, nagsiring hiya, “Hin-abtan mo ba ako, akon kaaway?” “Oo, hin-abtan ko ikaw,” binmaton hi Elias. “Nagpatakas ka hin pagbuhat han sayop ha atubangan han Ginoo.

21Sanglit nasiring ha imo an Ginoo, ‘Pagdadad-an ko ikaw hin karat-an. Igsisikway ko ikaw, ngan pagpupuohon ko an ngatanan nga kalalaken-an han imo panimalay, batan-on ngan tigurang.

22Masusugad an imo panimalay han mga panimalay nira Hadi Jeroboam nga anak ni Nebat ngan Hadi Baasa nga anak ni Ahias, kay imo ako gintukso hin kasina han pagtutdoi mo hin pakasala an Israel!’

23Ngan mahitungod kan Jezebel, nasiring an Ginoo nga kakaonon hin mga ayam an iya lawas didto ha syudad han Jezrael.

24Kakaonon hin mga ayam an bisan hin-o han imo mga uropod nga mamatay ha syudad, ngan kakaonon hin katamsihan an bisan hin-o nga mamatay ha kaumhan.” (

25Waray na gud iba nga nagpatakas hin pagbuhat hin kasaypanan ha atubangan han Ginoo sugad kan Acab—hi Jezebel nga iya asawa amo an nag-aghat ini ngatanan.

26Ginbuhat niya an labi hin kamakaarawod nga mga sala hin pagsingba hin mga diyosdiyos, sugad han ginbuhat han mga Amoreohanon nga gintabog han Ginoo tikang han tuna samtang nasulong an mga tawo han Israel.)

27Han kahuman hin pagyakan ni Elias, ginggisi ni Acab an iya mga panapton, ginhubo ini niya, ngan nagsul-ot hin bado nga sako. Dinmiri hiya hin pagkaon, kinmaturog nga sako an bado, ngan nagmasamdong ngan nagmabidoon hiya.

28Nagsiring kan manaragna Elias an Ginoo,

29“Hinkit-an mo ba kon gin-unan-o ni Acab hin pagpaubos ha akon atubangan? Tungod nga ginbuhat niya ini, diri ko pagdadad-on ha iya an karat-an ha panahon nga buhi pa hiya; pagdadad-on ko an karat-an ngada han panimalay ni Acab ha panahon nga an iya anak amo na an hadi.”

← Chapter 20 Jump to: Chapter 22 →