1 Chronicles 5

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 4 Jump to: Chapter 6 →

1下背係以色列長子呂便个後代。 ( 呂便㧯厥爸个細姐有無正常个關係，所以失去長子个權利。這兜權利歸給以色列个孻仔約瑟㧯佢个後代。照族譜呂便無算長子。

2雖然猶大支族最強大，對它產生一個領袖，統治所有支族，總係長子个權利歸給約瑟。)

3以色列个長子呂便有四個孻仔 — 哈諾、法路、希斯崙、迦米。

4下背係約珥照父系傳下來个後代：示瑪雅、歌革、示每、米迦、利亞雅、巴力、備拉。備拉係呂便支族个領袖，被亞述皇帝提革拉‧比列色捉過去。

7在呂便支族族譜頂高所記个族長名仔記在下背：耶利、撒迦利雅、比拉。

8比拉係亞撒个孻仔，示瑪个孫仔，屬約珥个宗族。這宗族个人住在亞羅珥，也有兜住在亞羅珥北片直到尼波㧯巴力‧免。

9佢等在基列地有一大群个頭牲，所以佢等佔領東片个土地，直到幼發拉底河這片个曠野。

10在掃羅王時代，呂便支族攻打夏甲人，將佢等㓾掉，佔領佢等在基列東片全部个土地。

11迦得支族住在呂便支族北片个巴珊地區，向東一直到撒迦。

12迦得支族中最主要个開設人係約珥；第二重要个開設人係沙番；巴珊地區其他宗族个開設人係雅乃㧯沙法。

13迦得支族其他个人屬下背七個宗族：米迦勒、米書蘭、示巴、約賴、雅干、細亞、希伯。

14佢等全部係戶利个孻仔亞比孩个後代。佢等个祖先向前算等上个順序係：亞比孩、戶利、耶羅亞、基列、米迦勒、耶示篩、耶哈多、布斯。

15押比疊个孻仔、古尼个孫仔亞希係這兜宗族个族長。

16佢等住在巴珊㧯基列地區，㧯沙崙逐位个草場。

17(這兜記錄係在猶大王約坦㧯以色列王耶羅波安做王期間編寫个。)

18呂便、迦得兩支族㧯東瑪拿西支族有訓練精良个軍隊四萬四千七百六十人；佢等盡會用盾牌、刀劍㧯弓箭。

19佢等去攻打伊突、拿非施、㧯挪答个夏甲族人。

20佢等信靠上帝，向佢祈求幫助，上帝聽佢等个祈禱，將夏甲人㧯佢等个盟國全部交在佢等个手中。

21佢等對敵人該位搶到五萬隻駱駝、二十五萬隻羊仔、兩千隻驢仔，又捉到十萬人。

22佢等㓾掉盡多敵人，因為這戰爭係上帝个旨意。佢等住在該地區，一直到被人捉去外國个時。

23東瑪拿西支族定居在巴珊地區，向北到巴力‧黑門、示尼珥㧯黑門山。佢等人口增加當遽。

24佢等逐宗族族長个名記在下背：以弗、以示、以列、亞斯列、耶利米、何達威雅、雅疊。這兜人全部係優秀个軍人，係這族當中有名个領袖。

25約旦河東片兩支族㧯半支族个人民對佢等祖先个上帝無忠心，離開佢，去拜該地原住民个神明；上帝識對這垤土地將該兜原住民逐走。

26所以以色列个上帝激動亞述皇帝普勒 (又安到提革拉‧比列色 ) 來侵犯佢等。普勒皇帝捉到呂便、迦得㧯東瑪拿西支族个人，將佢等捉到哈臘、哈博、哈拉㧯歌散河壩滣，佢等个後代直到今晡日還在該位。

← Chapter 4 Jump to: Chapter 6 →