2 Samuel 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1掃羅死後，大衛打贏亞瑪力人轉來，在洗革拉住兩日。

2第三日，有一個後生人對掃羅軍營來，佢扯爛衫，委灰在自家頭那頂。佢來到大衛面前，恭敬伏在地上。

3大衛問佢：「你對㖠位來？」佢講：「𠊎係對以色列軍營逃命出來个。」

4大衛問：「㧯𠊎講，該片个情況樣般？」該後生人講：「𠊎等个軍隊對戰場打輸逃走，盡多人戰死。掃羅㧯厥孻仔約拿單乜死掉了！」

5大衛問：「你樣般知掃羅㧯約拿單死掉了呢？」

6後生人應講：「𠊎堵好在基利波山，看到掃羅憑等佢个槍，敵人个戰車㧯騎兵盡遽就會逐到佢了。

7佢轉身看到𠊎，就喊𠊎。𠊎講：『𠊎在這位！』

8佢問𠊎係麼人；𠊎㧯佢講𠊎係亞瑪力人。

9佢講：『企到𠊎身邊來，將𠊎刺死！𠊎受重傷，會死了，總係還吂斷氣。』

10𠊎就過去㓾死佢，因為𠊎知佢已經橫掉救毋生了。𠊎拿下佢頭那頂个王冠㧯手髀項个手鈪，帶來這位獻給𠊎主人。」

11大衛悲傷到扯爛衫；佢个部下也全部扯爛衫。

12佢等傷心大噭，禁食到該暗晡，因為掃羅、厥孻仔約拿單㧯上主个子民以色列同胞在戰場死掉。

13大衛問該報消息給佢个後生人：「你係㖠位人？」佢應講：「𠊎係亞瑪力人，係住在你等國內个外族人。」

14大衛講：「你樣般敢㓾上主膏油立个王呢？」

15所以，大衛對一個部下講：「㓾掉佢！」該部下就將該亞瑪力人㓾死。

16大衛同時對該亞瑪力人講：「你罪有應得！你承認㓾死上主膏油立个王，恁樣就係定自家个死罪。」

17大衛為掃羅㧯厥孻仔約拿單做一首哀歌弔慰，

18下令將這首歌教猶大个人民。這首歌安到「弓歌」，記錄在《雅煞珥書》。

19在以色列个山頂，𠊎等个領袖死掉！𠊎等个英雄樣會橫落去！

20毋好在迦特報信；毋好在亞實基倫街路傳開。毋好俾非利士个婦女歡喜；毋好使外邦个細妹仔快樂。

21願基利波該兜山永遠無降雨露；願它个田地永遠荒涼。因為英雄个盾牌在該位染到血；掃羅个盾牌無再用油拭金。

22無看到敵人个血，約拿單个弓無放下來；無舐到勇士个油，掃羅个劍也無收回。

23掃羅㧯約拿單受人尊敬得人歡喜！佢等生前相愛相惜，臨死乜無分開；佢等比鷹鳥還較遽，比公獅還較強。

24以色列个婦女啊，愛為掃羅傷心流目汁！佢使你等著紅色个靚衫，使你等有好戴金銀珠寶。

25英雄樣會橫落去，死在戰場！約拿單也戰死在山頂！

26吾哥約拿單哪，𠊎為你哀傷！你對𠊎非常親愛！你个深情樣般美好，遠遠贏過婦女个愛情。

27英雄樣會橫落去；佢等个武器也廢掉。

Jump to: Chapter 2 →