2 Samuel 21

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 20 Jump to: Chapter 22 →

1大衛統治期間識堵到大飢荒，足足三年久。大衛為這事求問上主；上主講：「這係因為掃羅㧯佢个家族犯謀殺罪；佢㓾死基遍人。」

2( 基遍人毋係以色列人；佢等係亞摩利人當中賸到个人。以色列人識㧯佢等立約，愛保護佢等，總係掃羅想辦法愛消滅佢等，因為掃羅單單惜以色列人㧯猶大人。) 大衛王喊基遍人來，對佢等講：

3「𠊎應當為你等做麼介？𠊎應該用麼介來贖罪，你等正肯為上主个子民祝福？」

4基遍人應講：「𠊎等㧯掃羅家个冤仇毋係金銀所能解決个；𠊎等也無愛殺害以色列人。」大衛問：「恁樣，你等認為𠊎應該為你等做麼介？」

5佢等對王講：「掃羅謀害𠊎等，愛消滅𠊎等，毋俾𠊎等留在以色列國內住。

6所以，請你對佢个後代中交出七個男人來；𠊎等愛在基比亞，就係在上主選立掃羅做王个地方，在上主面前吊死佢等。」王講：「𠊎會將佢等交出來。」

7大衛王因為識㧯掃羅个孻仔約拿單在上主面前立約，所以留下約拿單个孻仔，就係掃羅个孫仔米非波設，

8總係將愛亞个妹仔利斯巴為掃羅𫱔个兩個孻仔亞摩尼㧯米非波設交出來。佢也將掃羅个妹仔米拉為米何拉人巴西萊个孻仔亞得列所𫱔个五個孻仔交出來。

9大衛王將佢等交給基遍人；基遍人就在山頂，在上主个面前吊死佢等。這七個人就共下死掉；佢等被人處死个時堵好係春天後期，開始收割大麥个季節。

10愛亞个妹仔利斯巴用麻布在屍體附近个磐石頂搭帳篷，對收割大麥到落秋雨个時一直住在該位；姖日時頭毋俾飛鳥停在屍體面頂，暗晡時毋俾野獸偎近。

11有人將掃羅个細姐利斯巴所做个事㧯大衛講，

12大衛就去基列个雅比人該位，將掃羅㧯厥孻仔約拿單个骨骸搬轉來。 ( 非利士人在基利波山㓾死掃羅該日，將佢等个屍體掛在伯‧珊个廣場；雅比人已經將屍體偷轉去。)

13大衛帶轉掃羅㧯厥孻仔約拿單个骨骸，也將該七個被人吊死个人入殮。

14照王个指示，佢等將掃羅㧯厥孻仔約拿單个骨骸葬在便雅憫地方个洗拉，在掃羅厥爸基士个墳墓肚。該時以後，上帝就聽佢等為國家祈禱。

15非利士人㧯以色列人又有戰爭；大衛帶佢个軍隊去攻打非利士人。一場戰爭打下來，大衛當𤸁了。

16有一個巨人，名安到以實‧比諾；佢帶等重三公斤半个銅槍，繫等新劍，想愛㓾大衛。

17總係洗璐雅个孻仔亞比篩過來協助大衛攻打該非利士人，將佢㓾死。後來大衛个部下要求大衛答應佢等，講：「請毋好再㧯𠊎等去相㓾，免得以色列个燈火烏掉。」

18這事以後，以色列人在歌伯又㧯非利士人相㓾。戶沙人西比該㓾死一個巨人喊做撒弗。

19在歌伯，以色列人㧯非利士人又有另外一場戰爭。伯利恆人睚珥个孻仔伊勒哈難㓾掉迦特人歌利亞；這人个槍柄像織布機个車心恁粗。

20後來在迦特又有戰爭。該地方有一個巨人；佢个手指㧯腳趾攏總係六支，總共有二十四支。

21佢向以色列人罵陣；大衛个阿哥示米亞个孻仔約拿單將佢㓾掉。

22以上四個人全部係迦特巨人个後代；佢等全部死在大衛㧯厥部下个手中。

← Chapter 20 Jump to: Chapter 22 →