2 Samuel 6

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 5 Jump to: Chapter 7 →

1大衛又召集以色列中个精兵，共有三萬人，

2帶佢等到猶大个巴拉去，想愛對該位將上帝个約櫃運過來；這約櫃个名係照該坐在基路伯頂个上主 — 萬軍元帥个名安个。

3佢等將上帝个約櫃放在一輛新車頂，對山頂亞比拿達个屋下運出來，亞比拿達兩個孻仔 — 烏撒㧯亞希約負責駛車；

4亞希約在約櫃頭前行。

5大衛㧯所有以色列人攏總放勢跳舞唱歌，榮光上主。佢等彈奏用杉仔做个各種樂器，有豎琴、七弦琴、鈴鼓、響板，還有鑇仔。

6佢等來到拿康个打麥場，該時拉車仔个牛逕倒，險險跪落去，烏撒就伸手扶等上帝个約櫃。

7主上帝因為烏撒違犯規定，就向佢發譴，擊打佢。佢就死在上帝約櫃个堘頭；

8該地方就喊做比列斯‧烏撒，直到今晡日。因為上主向烏撒發譴，處罰佢，大衛心肚當無歡喜。

9該日，大衛嚇倒，盡驚上主，就講：「𠊎這下樣敢將上主个約櫃請過來呢？」

10所以大衛決定毋將上主个約櫃運入大衛个城，就對別條路將約櫃運到迦特人俄別‧以東屋下。

11上主个約櫃在俄別‧以東屋下停留三個月；上主賜福給佢㧯佢全家。

12大衛王聽講，上主因為約櫃个緣故賜福給俄別‧以東全屋下人㧯所有屬佢个，就歡歡喜喜對俄別‧以東屋下將上帝个約櫃接到大衛个城。

13扛上主約櫃个人行六步腳个時，大衛就喊佢等停下來。佢向上主獻牛牯㧯肥个細牛做祭物。

14大衛只有在腰間圍等一領麻紗以弗得，放勢跳舞，榮光上主。

15佢㧯所有个以色列人歡呼歕羊角，將上主个約櫃接到耶路撒冷。

16上主个約櫃入大衛城个時，掃羅个妹仔米甲對窗門看出來，看到大衛王在上主面前放勢跳舞，就看輕佢。

17佢等將上主个約櫃扛下來，放在大衛預備好个帳篷肚。然後，大衛獻燒化祭㧯平安祭給上主；

18獻祭後，大衛奉上主 — 萬軍个元帥个名祝福人民，

19又將食物分給佢等；所有在以色列个人，無論男女，逐儕全部得到一垤餅，一垤肉㧯一垤葡萄餅；大家就轉屋下去。

20轉屋下後，大衛愛㧯家屬祝福。掃羅个妹仔米甲出來迎接佢，講：「以色列个王今晡日真有體面噢！佢像下流个人，在該兜官員个奴婢面前打赤膊！」

21大衛對米甲講：「𠊎跳舞係為到榮光上主。佢選立𠊎代若爸㧯若爸个家族，使𠊎做佢以色列子民个領袖。所以𠊎愛繼續跳舞榮光上主，

22使𠊎自家過較卑賤。你可能感覺𠊎毋知見笑，總係該兜奴婢感覺𠊎應該受尊敬呢！」

23掃羅个妹仔米甲一生人無𫱔子女。

← Chapter 5 Jump to: Chapter 7 →