Acts 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1提阿非羅先生：在𠊎所寫个第一本書底背，𠊎已經將耶穌个一切事情㧯教訓，對佢開始工作，

2到佢受接升天該日，全部講過。在升天以前，佢通過聖靈指示自家所揀選个使徒盡多事情。

3被人害死以後四十日中，佢識對佢等顯現好多擺，用各種个方法證明自家還生生；佢親身俾佢等看到，又對佢等講論上帝國个事情。

4佢等共下个時，佢吩咐佢等講：「毋好離開耶路撒冷。照𠊎㧯你等講過个，愛等吾爸所應許个。

5約翰用水行洗禮，總係幾日以後你等會領聖靈个洗禮。」

6使徒㧯耶穌聚集个時，問耶穌講：「主啊，這下你愛恢復以色列國个主權係麼？」

7耶穌㧯佢等講：「時間㧯日期係吾爸照自家个權柄所定个，毋係你等个事。

8總係聖靈臨到你等个時，你等會滿有能力，並愛在耶路撒冷、猶太㧯撒馬利亞全地，直到天涯海角，為𠊎做見證。」

9講了這個話，耶穌在佢等个注目中受接升天；佢升到雲頂高去，佢等就看佢毋到。

10佢離開个時，佢等注目望天。忽然，有兩個著白衫个人企在佢等塍頭，

11講：「加利利人啊，做麼介企在這位望天呢？這個離開你等、受接升天个耶穌，你等看到佢樣般升天，佢也會恁樣倒轉來。」

12使徒就對橄欖山轉耶路撒冷去；橄欖山離城無幾遠，約有一公里。

13一入城，佢等就上所住个樓頂；在該位有彼得、約翰、雅各㧯安德烈、腓力㧯多馬、巴多羅買㧯馬太、亞勒腓个孻仔雅各、激進黨个西門，㧯雅各个孻仔猶大。

14佢等常常共下同心祈禱；當中也有幾個婦人家㧯耶穌个阿姆馬利亞，並耶穌該兜老弟。

15過了幾日，有信徒个聚會，約有一百二十儕參加。彼得企起來，講：

16「各位兄弟！聖靈通過大衛个嘴在聖經所預言，關係猶大帶人捉耶穌个事，一定愛實現。

17這猶大本來受揀選來分擔𠊎等个工作，係𠊎等當中个一個。」

18( 猶大用佢作惡所得个錢買一垤田；在該位，佢顛倒頭仆下來，肚裂腸流，現死。

19住在耶路撒冷个人全部有聽到這件事，所以用佢等个話喊該垤地做亞革大馬，意思就係「血田」。)

20「就像《詩篇》所寫个：願佢个住所荒涼掉，無人住在該底背。又有一句寫等講：願別人得佢个職份。」

21彼得繼續講：「所以，一定愛另外揀選一個人加入𠊎等，共下做主耶穌復活个見證人。這人一定愛係主耶穌在𠊎等當中出入个時，對約翰行洗禮開始到耶穌受接升天這站時間，頭尾㧯𠊎等共下个人。」

23因為恁樣，大家推選兩個人，就係約瑟 (偏名巴撒巴，又安到猶士都 ) 㧯馬提亞。

24佢等祈禱講：「主啊，你知每一個人个心；求你指示𠊎等，這兩儕當中麼人係你所揀選，

25愛佢接這使徒職份个。這職份猶大已經放掉，到佢應該去个所在了。」

26講了這個話，佢等就抽籤仔，在兩儕當中抽出馬提亞來；佢就㧯其他十一儕共下算做使徒。

Jump to: Chapter 2 →