Acts 7 — Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

1大祭司問司提反講：「正經有這個事嗎？」

2司提反應講：「各位父老兄弟，請聽𠊎講！𠊎等个祖先亞伯拉罕住在美索不達米亞，還吂徙去哈蘭住个時，榮光个上帝對佢顯現，

3㧯佢講：『你愛離開你个故鄉㧯親族，到𠊎所愛指示你去个地方。』

4恁樣，亞伯拉罕就離開迦勒底人个所在，去住在哈蘭。厥爸死掉以後，上帝喊佢徙到這位來，就係你等這下所住个所在。

5該時，上帝還吂賜佢麼介產業，連企腳个所在乜無；總係上帝應許愛賜這垤土地給佢，做佢㧯後代个產業，雖然該時佢還吂有孻仔。

6上帝㧯佢恁樣講：『你个後代會住在外國，在該位做奴才，受蹧踏四百年。

7總係，使佢等做奴才个國家會被𠊎責罰。以後佢等會離開該所在，來這位服事𠊎。』

8上帝就㧯亞伯拉罕立約，用割禮做記號。因為恁樣，亞伯拉罕𫱔以撒以後，第八日就㧯佢行割禮；照樣，以撒㧯雅各行割禮，雅各㧯十二個族長行割禮。

9「該兜族長嫉妒約瑟，將佢賣到埃及去；總係上帝同佢共下，

10救佢脫離一切个災難。佢企在埃及王法老面前个時，上帝賜佢恩典㧯智慧。法老設立佢做國家个宰相㧯王宮个總管。

11無幾久後，埃及㧯迦南全地堵到嚴重个天旱，生活非常艱難；𠊎等个祖先也無麼介糧食。

12雅各聽講埃及有糧食，就喊佢該兜孻仔，就係𠊎等个祖先，去該位；這係第一擺。

13第二擺佢等去个時，約瑟㧯佢該兜兄弟相認；法老正認識約瑟个屋下人。

14約瑟派人去見厥爸雅各，請佢帶等全家到埃及來；攏總有七十五儕。

15雅各就南下到埃及；佢㧯其他个祖先死在該位。

16佢等个遺體被人送到示劍，葬在亞伯拉罕用錢對哈抹个子孫買來个墳墓底背。

17「上帝向亞伯拉罕所應許个時間來到以前，以色列族在埃及个人數已經增加盡多，

18直到有一個完全毋識約瑟个王開始統治埃及。

19該王用詭計對付𠊎等个同胞，苦毒𠊎等个祖先，強迫佢等㧒掉佢等个孲𤘅仔，毋俾孲𤘅仔生存。

20就在該時，摩西出世；佢生到盡得人惜，在厥爸个屋下養育三個月。

21佢被人㧒掉个時，法老个妹仔拈來，揇轉去做自家个孻仔。

22摩西就接受埃及一切个教育，盡有口才㧯辦事个能力。

23「摩西四十歲个時節，想愛去看以色列同胞个情形。

24佢看到一個同胞被埃及人欺負，就進前保護佢，為佢伸冤，將該埃及人㓾死。

25佢認為同胞會明白上帝愛用佢來救佢等，無想到佢等全毋會了解。

26第二日，佢看到兩個以色列人相打。佢想愛調解，就勸佢等講：『你等係自家人，做麼介彼此欺負呢？』

27該欺負同胞个將摩西㩳走，講：『麼人設立你做𠊎等个領袖㧯判官呢？

28你也愛㓾𠊎，像昨晡日㓾該埃及人共樣係麼？』

29摩西聽到這個話就偷走，離開埃及，去暫時住在米甸。在該位，佢𫱔兩個孻仔。

30「四十年後，在西奈山附近个曠野，有一個天使在竻樹个火焰中對摩西顯現。

31摩西看到這異象，心中非常奇怪，就行前去，想愛看到底發生麼介事情。該時，佢聽到主个聲講：

32『𠊎係若祖先个上帝，就係亞伯拉罕、以撒、雅各个上帝。』摩西驚到愊愊掣，毋敢看。

33主又㧯佢講：『脫下你个鞋仔！因為你所企个所在係聖地。

34𠊎个子民在埃及所受个苦難，𠊎有看到清清楚楚；𠊎也有聽到佢等个歎息。𠊎下來，就係愛救佢等。來！𠊎派你去埃及。』

35「這摩西就係以色列人所棄絕、被人講：『麼人設立你做𠊎等个領袖㧯判官呢？』通過在竻樹中顯現个天使，上帝派佢做領袖、做拯救者。

36佢帶領人民出埃及；佢在埃及、在紅海，㧯在曠野个四十年間，行盡多神蹟奇事。

37就係這個摩西㧯以色列人講：『上帝愛對你等个同胞中間為你等興起一個先知，像佢興起𠊎一樣。』

38就係佢在曠野同以色列會眾共下生活；佢同在西奈山㧯佢講話个天使並𠊎等个祖先共下；佢領受上帝永生个道理，將這道理傳給𠊎等。

39「總係，𠊎等个祖先毋肯聽從佢，反轉棄絕佢，心肝想念埃及。

40佢等對亞倫講：『為𠊎等造兜神明來帶領𠊎等。因為帶𠊎等出埃及个該隻摩西，𠊎等毋知佢堵到麼介事情。』

41該時，佢等就鑄造一隻細牛仔，對這偶像獻祭，為自家个手所做个東西歡喜慶祝。

42上帝就轉身毋搭佢等，由在佢等去拜天頂个星辰，像先知書所講：以色列人啊，在曠野該四十年，你等並無獻麼介牲儀抑係禮物給𠊎！

43你等扛等摩洛神个帳篷，又扛等理番神个星辰像，就係你等做來拜个偶像。所以，𠊎愛將你等徙到巴比倫外背去！

44「𠊎等个祖先在曠野有表示上帝臨在个聖帳篷 (底背放約櫃)，係上帝吩咐摩西照佢所指示个模型造个。

45後來，𠊎等个祖先繼承這聖帳篷。上帝在佢等面前逐走外邦人、佔領該土地个時，約書亞㧯佢等將這聖帳篷徙去該位，直到大衛个時代。

46大衛得到上帝个恩典。佢就求上帝准佢為佢，就係雅各个上帝，起一座聖殿；

47總係，後來為上帝起聖殿个係所羅門。

48「其實，至高个上帝並毋係住在人手所起个聖殿，像先知所講：

49主講：天係𠊎个寶座；地係𠊎个踏凳。你等愛為𠊎起㖠種个聖殿呢？㖠位愛做𠊎休息个所在呢？

50這一切敢毋係𠊎親手創造个嗎？

51「你這兜硬頸个人啊，心肝硬、耳公塞等毋肯聽上帝个話！你等㧯你等个祖先共樣，一直同聖靈作對！

52㖠個先知毋識受到你等祖先个迫害呢？該兜先知宣佈講，該公義个僕人愛來，你等个祖先卻將佢等㓾掉；這下，你等又出賣這僕人，殺害佢。

53你等係承接上帝法律个人；這法律係天使傳下來个，總係你等毋肯遵守法律！」

54眾議員聽了司提反這兜話，譴到咬牙切齒。

55總係，司提反被聖靈充滿，昂頭望天，看到上帝个榮光，又看到耶穌企在上帝个右片，

56就講：「𠊎看到天開了，人子企在上帝个右片！」

57佢等就大聲喊，用手揞耳公，歸下圍上去，捉司提反，

58將佢㩳到城外，用石頭㧹佢。該兜證人將自家个外衫交給一個名安到掃羅个青年掌等。

59佢等㧹等石頭个時，司提反大聲對主求講：「主耶穌啊，求你接納𠊎个靈魂！」

60佢又跪下來，大聲喊講：「主啊，毋好將這個罪歸給佢等！」佢講煞，就死掉。