Acts 22

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 21 Jump to: Chapter 23 →

1保羅講：「各位父老兄弟，請聽𠊎个辯護。」

2佢等一聽到保羅用希伯來話對佢等講話，就還較恬。保羅繼續講：

3「𠊎係猶太人，出世在基利家个大數，總係在耶路撒冷長大个，係迦瑪列个學生，接受祖先一切法律个嚴格訓練，熱心事奉上帝，同你等今晡日在場个每一個人共樣。

4𠊎識將遵行這道个人迫到死，也搜查男女信徒，捉佢等，關在監獄肚。

5大祭司㧯全議會个長老做得證明𠊎所講个話係實在个。𠊎對佢等拿到給大馬士革个猶太同胞个信仔，所以𠊎去該位，愛捉該兜人，將佢等䌈等，帶轉耶路撒冷來接受刑罰。

6「𠊎會到大馬士革个時，約在當晝頭，忽然有大光對天頂下來，照在𠊎个周圍。

7𠊎橫在地上，聽到有聲對𠊎講：『掃羅，掃羅！你做麼介迫害𠊎？』

8𠊎問講：『主啊，你係麼人？』佢講：『𠊎就係你所迫害个拿撒勒人耶穌。』

9該兜同𠊎共下去个人看到該光，總係無聽明該對𠊎講話个聲。

10𠊎又問：『主啊，𠊎愛做麼介正好？』主對𠊎講：『䟘起來，入大馬士革城去，在該位有人會㧯你講上帝愛你做个一切事。』

11因為該光盡強，害𠊎个目珠看毋到，同𠊎共下去个人就牽等𠊎个手，帶𠊎入大馬士革城。

12「在該位，有一個人名安到亞拿尼亞。佢係虔誠、嚴守法律个人，盡受大馬士革所有猶太人个尊重。

13佢來看𠊎，企在𠊎个身邊，講：『掃羅兄弟啊，願你看得到！』該時，𠊎个目珠好了，𠊎就看到佢。

14佢講：『𠊎等祖先个上帝已經揀選你，愛使你明白佢个旨意，可以看到佢公義个僕人，也聽到佢親口所講个聲音。

15因為你愛為佢做見證，將你所看到所聽到个㧯萬民講。

16這下，你還延纏麼介？䟘起來，求喊佢个名，來領洗禮，使你个罪得到洗淨！』

17「後來，𠊎轉到耶路撒冷；在聖殿肚祈禱个時，𠊎入神得到一個異象，

18在異象中，𠊎看到主。佢對𠊎講：『遽遽離開耶路撒冷，因為這地方个人毋會接受你為𠊎所做个見證。』

19𠊎講：『主啊，佢等攏總知𠊎識入各會堂，捉信你个人去關，並鞭打佢等。

20你个見證人司提反受害流血到死个時，𠊎也在場，贊成該件事，還代該兜害死佢个人掌衫。』

21主㧯𠊎講：『你去！𠊎愛派你去遠方，到外邦人該位。』」

22眾人本來恬恬聽保羅講話；總係一聽到這句話，就大聲喊講：「除掉佢！㓾死佢！這種人係該死个！」

23佢等就一片吵，一片將衫抨掉，又向天委泥粉。

24羅馬个指揮官就命令將保羅帶入營房，又吩咐兵仔鞭打拷問佢，愛查出眾人為麼介對佢恁樣盡喊。

25佢等將佢捆起來愛打个時，保羅對企在身邊个一個軍官講：「對一個羅馬公民，無經過審判，你等就鞭打佢，這係合法个嗎？」

26該軍官一聽到這句話，就去見指揮官，對佢講：「你想樣般正好？該人係羅馬个公民！」

27指揮官去見保羅，問佢講：「㧯𠊎講，你係羅馬公民無？」保羅應講：「係。」

28指揮官講：「𠊎用一大筆个錢，正得到公民个身份。」保羅講：「𠊎出世就係。」

29所以，該兜愛拷問保羅个人遽遽閃開；指揮官一知保羅係羅馬公民，又因為識捆過保羅，就著驚起來。

30該指揮官想愛知猶太人告保羅實在个原因，所以，第二日，佢解開保羅个鎖鍊，召集祭司長㧯全議會，然後將保羅帶出來，喊佢企在佢等面前。

← Chapter 21 Jump to: Chapter 23 →