John 20

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 19 Jump to: Chapter 21 →

1禮拜日打早，天還吂光，抹大拉个馬利亞就去墳墓，看到封等墓門个石頭已經徙開。

2姖就走去尋西門‧彼得㧯耶穌所惜个該學生，㧯佢等講：「有人將主對墳墓徙走，𠊎等毋知佢等將佢放在㖠位！」

3彼得㧯該學生就去墓地。

4兩儕共下走，總係該學生比彼得走較遽，先到墳墓。

5佢探身看入去，看到麻紗還留在該位，總係佢無入去。

6西門‧彼得跈等也趕到；佢直接入去墳墓底背，看到麻紗還留在該位，

7又看到耶穌个頭巾也留在該位，總係無同麻紗共下，係捲等在別位。

8該先到个學生也跈等入墳墓；佢一看到就信。

9(佢等還係無明白聖經所講，佢的確愛對死復活个意思。)

10然後，兩個學生就轉去屋下。

11馬利亞還企在墳墓外噭。姖緊噭緊探頭看墳墓底背。

12姖看到兩個著白衫个天使，坐在本來放耶穌身屍个所在，一個在頭這片，一個在腳該片。

13佢等問馬利亞講：「婦人家，你噭麼介？」姖應講：「佢等將𠊎个主徙走，毋知佢等將佢放在㖠位！」

14講了，馬利亞轉身，看到耶穌企在該位，總係還毋知佢就係耶穌。

15耶穌問姖講：「婦人家，你噭麼介？你尋麼人？」馬利亞恅到佢係管園仔个人，所以對佢講：「先生，若係你將佢徙走，請㧯𠊎講，你將佢放在㖠位，𠊎好將佢徙轉來。」

16耶穌講：「馬利亞！」馬利亞轉身，用希伯來話對佢講：「拉波尼！」 (意思就係「先生」。)

17耶穌講：「毋好拉等𠊎，因為𠊎還吂上去見吾爸。你去𠊎个兄弟該位，㧯佢等講：『𠊎愛上去見吾爸，就係你等个阿爸，見𠊎个上帝，就係你等个上帝。』」

18所以，抹大拉个馬利亞就去㧯學生講：「𠊎已經看到主了！」姖又將主對姖講个話報給佢等知。

19該禮拜日暗晡，耶穌个學生聚集共下，門關到𢫮𢫮，因為佢等驚猶太人个領袖。該時，耶穌顯現，企在佢等當中，講：「願你等平安！」

20講了這個話，佢將手㧯脇下給佢等看。學生看到主，就非常歡喜。

21耶穌又對佢等講：「願你等平安！像阿爸差派𠊎，𠊎也照樣差派你等。」

22講了，佢向佢等歕一口氣，講：「領受聖靈！

23你等赦免麼人个罪，佢等个罪就會得到赦免；你等毋赦免麼人个罪，佢等个罪就毋會得到赦免。」

24耶穌顯現个時節，十二個學生當中个多馬 (偏名雙生仔) 無同佢等共下。

25所以其他个學生就㧯多馬講：「𠊎等已經看到主了！」多馬對佢等講：「除了𠊎親眼看到厥手項个釘跡，用𠊎个手指摸該釘跡，又用𠊎个手探佢个脇下，𠊎絕對毋信。」

26一禮拜以後，學生又在屋肚聚集；多馬也同佢等共下。門關等，總係耶穌忽然顯現，企在佢等个當中，講：「願你等平安！」

27然後佢對多馬講：「伸若手指來，摸看𠊎个手；伸若手來，探𠊎个脇下。毋好疑狐，愛信！」

28多馬講：「𠊎个主，𠊎个上帝！」

29耶穌講：「因為看到𠊎，你正信係麼？該兜無看到就信个人係樣般有福氣啊！」

30耶穌在厥學生面前還行盡多神蹟，總係無記錄在這本書底背。

31寫這本書个目的係愛你等信耶穌係基督，係上帝个孻仔，也愛你等因為信佢來得到生命。

← Chapter 19 Jump to: Chapter 21 →