John 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1太初有道，道㧯上帝同在，道就係上帝。

2佢在太初㧯上帝同在。

3上帝通過佢創造萬有；所有受創造个，無一樣毋係通過佢造个。

4道就係生命个源頭，這生命將光賜給人類。

5光照在烏暗中，烏暗從來毋識贏過光。

6有一個人，名安到約翰，係上帝所差派个使者。

7佢來為該光做證，愛使大家聽到佢个道理來信。

8佢本身毋係該光，係愛為光做證。

9該光係真光，來到世間光照全人類。

10道在世間，上帝係通過佢創造世界，總係世間人毋識佢。

11佢來到自家个地方，自家个人卻毋接受佢。

12總係凡接受佢个，就係信佢个人，佢就賜佢等做上帝子女个權利。

13這兜人做上帝个子女毋係因為血統關係，像對人个性慾抑係對男人个意思來𫱔个，係對上帝𫱔个。

14道成做肉身，住在𠊎等个當中，充滿恩典㧯真理。𠊎等有看到佢个榮光，這係阿爸獨一个孻仔正有个榮光。

15約翰為佢做證，喊講：「關係佢，𠊎識講：『佢比𠊎較慢來，總係比𠊎較偉大；因為𠊎吂出世，佢已經存在。』」

16對佢个豐盛，𠊎等全部有領受到恩典，並恩上加恩。

17上帝通過摩西頒佈法律，總係恩典㧯真理係通過耶穌基督來个。

18從來毋識有人看到上帝，只有獨一个孻仔上帝就係在阿爸懷中个，將佢啟示出來。

19以下係約翰个見證。當時，猶太人个領袖對耶路撒冷派兜祭司㧯利未人去見約翰，問佢講：「你係麼人？」

20約翰無拒絕回答，反轉坦白㧯佢等講：「𠊎並毋係基督。」

21佢等就問：「恁樣，你係麼人？係以利亞嗎？」約翰應講：「𠊎毋係。」佢等又問：「係該先知嗎？」佢又應講：「毋係。」

22佢等接等講：「請你㧯𠊎等講，你到底係麼人，𠊎等好回覆派𠊎等來个人。你自家講，你係麼人？」

23約翰用先知以賽亞个話回答，講：「在曠野有人喊講：『為主修直佢所愛行个道路！』𠊎就係這個人。」

24法利賽人所派來个該兜人

25質問約翰講：「你既然毋係基督，毋係以利亞，也毋係該先知，恁樣，你做麼介行洗禮哪？」

26約翰應講：「𠊎係用水行洗禮；總係有一個企在你等當中，你等毋識个，

27佢比𠊎較慢來，𠊎就係㧯佢脫鞋也無資格。」

28這兜事發生在約旦河東片个伯大尼，就係約翰行洗禮个所在。

29第二日，約翰看到耶穌對佢行等過來，就講：「看啊，上帝个羔羊，除掉世間人个罪个！

30這個人就係𠊎識講个：『佢比𠊎較慢來，總係比𠊎較偉大；因為𠊎還吂出世，佢已經存在。』

31𠊎並毋識佢；總係𠊎來，用水行洗禮，為到愛俾以色列人認識佢。」

32約翰又做證講：「𠊎看到聖靈像月鴿仔對天頂降臨，落在佢个身上。

33𠊎還係毋識佢，總係差𠊎用水行洗禮个上帝㧯𠊎講：『你看到聖靈降臨，落在麼人个身上，這儕就係用聖靈行洗禮个。』

34𠊎已經看到了，所以對你等做證，佢就係上帝个孻仔。」

35又過一日，約翰㧯厥兩個學生又企在該位；

36佢看到耶穌經過，就講：「看啊，上帝个羔羊！」

37該兩個學生一聽到這個話，就去跈耶穌。

38耶穌轉身，看到佢等跈等佢，就問講：「你等尋麼介？」佢等應講：「拉比，你住在㖠位？」 (「拉比」个意思就係「先生」。)

39耶穌講：「你等來看！」佢等跈佢去，看到佢住个所在，該日就同佢共下住。 (該時大約係下晝四點鐘。)

40聽到約翰个話就跈耶穌个兩儕中，有一個係西門‧彼得个老弟安德烈。

41佢先尋到佢个阿哥西門，㧯佢講：「𠊎等已經尋到彌賽亞了。」 (「彌賽亞」个意思就係「基督」。)

42然後佢就帶西門去見耶穌。耶穌注目看佢，講：「你係約翰个孻仔西門，總係你會被人喊做磯法。」 ( 磯法㧯彼得意思共樣，就係「磐石」。)

43又過一日，耶穌決定去加利利省。佢尋到腓力，對佢講：「來跈𠊎！」

44( 腓力係伯賽大人，㧯安德烈並彼得同鄉。)

45腓力尋到拿但業，㧯佢講：「摩西在法律書中所寫㧯眾先知所記載个該儕，𠊎等已經尋到了。佢就係約瑟个孻仔，拿撒勒人耶穌。」

46拿但業就對佢講：「拿撒勒敢會出麼介好个嗎？」腓力講：「你來看！」

47耶穌看到拿但業對佢行等過來，就講：「看啊，佢係一個真實个以色列人；佢个心中無詭詐！」

48拿但業問佢講：「你樣會識𠊎？」耶穌應講：「你在無花果樹下，腓力吂喊你，𠊎已經看到你。」

49拿但業講：「先生，你係上帝个孻仔；你係以色列个君王！」

50耶穌講：「因為𠊎㧯你講，𠊎看到你在無花果樹下，你就信係麼？你會看到比這還較大个事情！」

51耶穌又講：「𠊎實在㧯你等講，你等會看到天開，上帝个天使在人子身項上去下來。」

Jump to: Chapter 2 →