Jonah 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1有一日，上主向亞米太个孻仔約拿講：

2「你去尼尼微該座大城，公開責備該位个人，因為佢等个邪惡達到𠊎个面前！」

3總係約拿向相反个方向行，想愛逃走離開上主。佢到約帕港，尋到一條愛駛去他施个船。佢付錢上船，愛㧯船員共下去他施，來閃上主。

4總係，上主使海上起大風，狂風大浪打該條船，船強強像會打壞。

5船員全部非常著驚，逐儕向自家个神明哀求。為到愛減輕船个重量，佢等就將船頂个貨物㧒落海肚。約拿早就下到船底，橫在該位睡到毋知醒。

6船長去到佢該位對佢講：「你樣般還在這位睡呢？䟘起來，求你个神明！無一定佢會可憐𠊎等，來救𠊎等。」

7船頂个人大家參詳：「𠊎等來抽籤，看係麼人个罪惡害𠊎等堵到這災難。」佢等就抽籤，抽到約拿。

8佢等問佢：「㧯𠊎等講，這災難係毋係你惹起个？你食麼介頭路？對㖠位來？係㖠國㖠族个人？」

9約拿應講：「𠊎係希伯來人。𠊎敬畏上主。佢係天頂个上帝，係大海㧯陸地个創造主。」

10約拿又㧯佢等講，佢這下就係愛逃走離開這位上主。船員聽到這兜話，非常著驚，就對佢講：「你樣會恁樣呢！」

11因為風浪越來越大，佢等就問佢：「𠊎等愛樣般處理你，正能使風浪平靜下來呢？」

12約拿應講：「將𠊎扛起來，㧹落海肚，風浪就會平靜；因為𠊎知係𠊎个罪過使你等堵到這个風差。」

13船員反轉出力撐船，愛將船撐到海滣去。總係風浪越來越強，佢等無法前進。

14所以佢等求喊上主，講：「上主啊，求你毋好因為這人个罪使𠊎等死掉，也毋好因為這人个死來討𠊎等个命。上主啊，這一切全部係照你自家个意思做个。」

15話講煞，佢等就將約拿扛起來，㧹落海肚；風浪黏時平靜下來。

16船員全部因為這件事大大敬畏上主，向上主獻祭，又許願愛事奉佢。

17這時，上主安排一條大魚，將約拿吞落去。約拿在魚肚笥三日三夜。

Jump to: Chapter 2 →