Jonah 4

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 3 Jump to:

1對這件事，約拿盡無歡喜，當閼。

2所以佢祈禱講：「上主啊，𠊎離開家鄉以前，毋係㧯你講過，你一定會恁樣做嗎？就係因為恁樣，𠊎正會拚命逃到他施去！𠊎知你係有恩典、有憐憫个上帝；你無隨便發譴，有豐盛个慈愛；你願意回心轉意，毋責罰人。

3所以，上主啊，俾𠊎死好了！𠊎還係死較好！」

4上主應講：「你恁樣發譴敢有理？」

5所以約拿到城外去，在城个東片坐下來。佢搭一隻寮仔，坐在它个陰影下，愛看尼尼微城會發生麼介事。

6後來，主上帝安排一頭蓖麻樹，使它生到比約拿較高，樹影遮等佢个頭那，使佢感覺涼爽。約拿非常歡喜這頭樹。

7總係，第二日打早，上帝安排一尾蟲仔來咬這頭樹仔，樹仔就燥死掉。

8日頭出來以後，上帝又安排燒風對東方吹過來。因為日頭當𤊶，直接曬約拿个頭那，佢被日頭曬到強強會昏掉，所以佢就求死。佢講：「𠊎還係死較好！」

9總係上帝對佢講：「你為這頭蓖麻樹恁發譴敢有理？」約拿應講：「𠊎發譴到會死乜有理！」

10上主對佢講：「這頭樹仔一暗晡就大起來，第二日就燥死掉；你雖然無種它，也無𢯭手使它大起來，你還為它感覺可惜。

11恁樣，𠊎毋係還較應該憐憫尼尼微這座大城嗎？在這城肚有超過十二萬連左手右手都分毋出个人，又還有當多頭牲！」

← Chapter 3 Jump to: