Joshua 17

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 16 Jump to: Chapter 18 →

1約瑟个長子瑪拿西个後代分到約旦河西片个部份土地。瑪吉係瑪拿西个長子，係基列个阿爸，佢盡會相㓾，所以約旦河東片个基列㧯巴珊就歸給佢。

2約旦河西片个土地歸給其他个瑪拿西家族，就係亞比以謝、希勒、亞斯列、示劍、希弗㧯示米大。佢等係約瑟个孻仔瑪拿西逐家族个族長。

3西羅非哈係希弗个孻仔、基列个孫仔、瑪吉个曾孫，瑪拿西个玄孫；佢無孻仔，只有妹仔。姖等个名係瑪拉、挪阿、曷拉、密迦、得撒。

4姖等到祭司以利亞撒、嫩个孻仔約書亞，㧯該兜領袖面前，講：「上主吩咐摩西給𠊎等一份土地做產業，像給男人共樣。」所以，照上主个命令，姖等也㧯姖等个阿叔阿伯共樣分到土地。

5瑪拿西支族，除了約旦河東片个基列㧯巴珊以外，還得到十份，

6因為這幾個女子孫㧯其他个男子孫共樣有分到土地。瑪拿西其他个後代得到基列。

7瑪拿西支族个地界對亞設直到示劍東片个密米他，南片到隱‧他普亞人住个地方。

8他普亞周圍个土地屬瑪拿西，總係在邊境个他普亞鎮係屬以法蓮後代。

9瑪拿西支族个地界對該位向南到加拿河。河南片个城鎮雖然在瑪拿西境內，總係屬以法蓮。瑪拿西支族个地界順等河个北片直到地中海。

10以法蓮在南片；瑪拿西在北片；地中海係佢等西片个地界。亞設在西北角；以薩迦在東北角。

11瑪拿西支族在以薩迦㧯亞設境內得到伯‧善㧯以伯蓮，並附近个村莊，還有多珥 (就係在海滣該城)、隱‧多珥、他納、米吉多、㧯這兜城鎮附近个村莊。

12總係瑪拿西人無法度將該兜城肚个人民逐走，所以迦南人還係繼續住在該位。

13甚至當以色列人強壯个時，佢等也無將所有个迦南人逐走，只有強迫迦南人做苦工。

14約瑟个後代對約書亞講：「做麼介你只有分一份土地給𠊎等做產業呢？上主賜福給𠊎等，𠊎等个人數當多啊！」

15約書亞講：「若係你等人數多，嫌以法蓮山區忒細，就到比利洗人㧯利乏音人个樹林肚去開墾土地啊！」

16約瑟个後代講：「對𠊎等來講，該山區還係毋罅闊，毋單淨恁樣，住在平原个迦南人，就係在伯‧善㧯附近村莊，還有耶斯列平原个人，全部也有鐵戰車啊。」

17約書亞對約瑟支族，就係以法蓮㧯西瑪拿西支族个人講：「你等个人口確實當多；你等也當強大，毋應該只得到一份土地。

18該山區愛歸你等；雖然係樹林，你等做得去開發，就會得到盡闊个土地。就算迦南人有鐵戰車，當強大，你等也會將佢等逐出去。」

← Chapter 16 Jump to: Chapter 18 →