Joshua 4

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 3 Jump to: Chapter 5 →

1國民全部過約旦河以後，上主對約書亞講：

2「你愛對人民當中選出十二個人，各支族一儕，

3吩咐佢等到約旦河肚、到祭司企住个地方，取十二隻石頭，然後帶過去，放在你等今暗晡安營个地方。」

4所以，約書亞對以色列人當中設立十二個人，各支族一儕，將佢等召集共下，

5吩咐佢等：「你等到約旦河肚，行到上主 — 你等上帝个約櫃頭前，逐儕對河壩肚取一隻石頭，擎在自家肩頭。逐隻石頭代表以色列一個支族。

6你等愛將這兜石頭頓起來做紀念碑。將來，你等个子孫問起你等：『這兜石頭係紀念麼介？』

7你等愛㧯佢等講，上主个約櫃過約旦河个時，河壩水就停下來、無流動。這兜石頭愛永遠使以色列人紀念在這位所發生个事。」

8該十二儕就照約書亞个命令去做。佢等遵照上主吩咐約書亞个話對約旦河肚取十二隻石頭，逐隻石頭代表以色列一個支族；佢等將石頭擎到營地，放在該位。

9約書亞也在約旦河肚，在祭司扛等約櫃企住个地方，另外堆十二隻石頭。 (該兜石頭到今晡日還留在該位。)

10該兜扛約櫃个祭司企住在約旦河中央，等人民完成上主吩咐約書亞喊佢等去做个事。這也係照摩西命令約書亞做个。人民遽遽過約旦河。

11佢等全部過河以後，該兜祭司正扛等上主个約櫃，在大眾面前行過去。

12呂便、迦得兩支族，㧯瑪拿西半支族裝備好个戰士，照摩西个吩咐，在以色列人最頭前行。

13大約有四萬裝備好个戰士在上主面前過河，到耶利哥平原準備相㓾。

14該日，上主使以色列人民全部尊約書亞做大領袖。對該時起，約書亞㧯摩西共樣，一生人受人民尊敬。

15上主吩咐約書亞講：

16「命令該兜扛等約櫃个祭司對約旦河上來。」

17約書亞就照恁樣去做。

18該兜扛等上主約櫃个祭司對約旦河一上來、踏到燥地，河壩水又開始流通，㧯頭擺共樣漲過兩岸。

19正月初十，人民對約旦河上來，就在耶利哥東片个吉甲安營。

20約書亞將該兜對約旦河肚擎來个十二隻石頭頓在該位。

21佢對以色列人講：「將來，你等个子孫問起你等：『這兜石頭係紀念麼介？』

22你等愛㧯佢等講：『以色列人識行過變做燥地个約旦河。』

23上主 — 你等个上帝使你等頭前个約旦河燥掉，等到你等全部行過去，就像佢當年使𠊎等頭前个紅海燥掉，俾𠊎等行過去共樣。

24佢恁樣做，愛使天下萬民全部知上主个手大有能力，也愛使你等永遠敬畏上主 — 你等个上帝。」

← Chapter 3 Jump to: Chapter 5 →