Leviticus 19

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 18 Jump to: Chapter 20 →

1上主吩咐摩西

2向以色列全會眾宣佈：「你等愛聖潔，因為𠊎 — 上主、你等个上帝係聖潔个。

3「你等逐儕一定愛遵守𠊎个誡命，孝順父母，守安息日。𠊎係上主 — 你等个上帝。

4「你等做毋得離開𠊎去拜偶像；也做毋得為自家鑄造偶像。𠊎係上主 — 你等个上帝。

5「你等㓾頭牲做平安祭獻給𠊎 — 上主个時，愛照𠊎頒佈給你等个條例，𠊎就會接受你等个牲儀。

6祭肉愛在奉獻个當日抑係第二日食掉。到第三日，祭肉若係還有賸，愛用火燒掉，

7因為這係無淨浰个。若有人拿去食，𠊎就毋接受所獻个牲儀。

8食个人就有罪，因為佢褻瀆獻給𠊎个聖物；佢一定會對𠊎个子民中除名。

9「你等收割个時，毋好將田角割淨淨，也毋好去拈跌下來个榖串。

10做毋得將葡萄園个葡萄摘淨淨，也做毋得拈跌下來个葡萄；愛將這兜留給窮苦人㧯暫住个旅客。𠊎係上主 — 你等个上帝。

11「做毋得做賊；做毋得欺騙；做毋得講花撩。

12做毋得指等𠊎个名發假誓，侮辱𠊎个名。𠊎係上主 — 你等个上帝。

13「做毋得剝削鄰舍，也做毋得搶佢个東西。愛付給工人个工錢做毋得拖，就算一暗晡也做毋得。

14「做毋得咒罵耳聾个，也做毋得阻礙瞙目个路，使佢跌倒。你等愛敬畏𠊎；𠊎係上主 — 你等个上帝。

15「你等審判个時節，做毋得無公當；做毋得偏心對待窮苦人，也做毋得巴結有權勢个人。愛用公正對待同胞。

16做毋得到處去搬弄是非；做毋得害鄰舍个生命。𠊎係上主。

17「做毋得心肚怨恨兄弟；同胞有毋著，你愛坦白指責佢，免得你因為佢來擔到罪。

18做毋得報仇；也做毋得怪怨本國个同胞。愛惜鄰舍，就像惜自家一樣。𠊎係上主。

19「你等愛遵守𠊎个誡命。「做毋得使無共類个頭牲配種。做毋得在一坵田委兩樣種。做毋得著兩種原料刺成个衫褲。

20「已經㧯別人有婚約个奴婢，還吂被人贖轉去、還吂自由个時，若係有人㧯姖有性關係，該人愛受處罰；總係毋好將兩儕處死，因為該時奴婢還吂得到自由。

21該人愛牽一隻綿羊牯到聖帳篷門口做贖過失祭獻給上主。

22祭司愛用該隻羊在上主面前代佢行贖罪禮，上主正會赦免佢所犯个罪。

23「你等進入迦南地以後，無論種㖠種果子樹，頭三年个果子愛看做受禁止个，你等做毋得食。

24第四年打个果子愛全部奉獻給上主做聖物，表示你等對𠊎个感恩。

25到第五年，你等就做得食該樹頂个果子。你等恁樣做，果子樹就會結出過較多个果子。𠊎係上主 — 你等个上帝。

26「你等做毋得食帶血个肉。「做毋得卜卦，也做毋得算命。

27「做毋得剃掉頭那周圍个頭那毛，也做毋得將鬍鬚个周圍剃掉。

28為死人哀傷个時，做毋得紋身，抑係割自家个身體。𠊎係上主。

29「你等做毋得俾自家个妹仔受侮辱去做神廟娼妓。若係恁樣做，你等會轉向別个神明，使你等住个地方充滿淫亂。

30「你等愛守𠊎个安息日，尊重𠊎个聖所。𠊎係上主。

31「你等做毋得去交鬼，也做毋得去問行邪術个；若係求問佢等，你等就變做無淨浰。𠊎係上主 — 你等个上帝。

32「你等愛尊敬老人家，在白頭那毛个人面前恭敬企等。你等愛敬畏𠊎；𠊎係上主 — 你等个上帝。

33「你等做毋得欺負暫時住在你等當中个旅客。

34款待佢等愛像款待以色列同胞恁樣，惜佢等愛像惜自家共樣。愛記得你等識在埃及暫住過。𠊎係上主 — 你等个上帝。

35「做毋得用無公平个尺、斗、秤欺騙人；

36愛用公平个秤、尺、斗。「𠊎係上主 — 你等个上帝；𠊎對埃及將你等𢱋出來。

37你等愛遵守𠊎一切个法律，實行𠊎一切个條例。𠊎係上主。」

← Chapter 18 Jump to: Chapter 20 →