Ruth 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1當士師治理以色列該站期間，地方上發生飢荒。有一個以法他族人，名安到以利米勒，原來住在猶大个伯利恆；佢帶等𡜵娘拿娥美㧯兩個孻仔瑪倫㧯基連，全家徙到摩押去，暫時住在該位。

3後來以利米勒死掉，留下拿娥美㧯姖兩個孻仔；

4這兩個孻仔討摩押地方个細妹仔 — 娥珥巴㧯路得。大約十年後，

5瑪倫㧯基連也死掉，留下拿娥美，無老公，也無孻仔。

6拿娥美還住在摩押个時，聽講上主看顧佢个子民，已經使佢等有收成，就準備㧯兩個心舅離開摩押轉故鄉去。

7姖等共下起身愛轉猶大，總係在路上，

8拿娥美對兩個心舅講：「你兩儕轉妹家去好哪！願上主用慈愛款待你等，像你等好款待𠊎㧯已經死掉个人共樣。

9願上主使你等有機會再結婚，兩儕有安身个所在。」然後，拿娥美唚姖等。兩個心舅就開聲大噭，

10對姖講：「無愛！𠊎等愛㧯你轉你本族該位去。」

11拿娥美講：「𠊎个妹仔啊，你等還係轉去哪！愛跈𠊎去做麼介呢？𠊎敢還會𫱔孻仔來給你等做老公嗎？

12𠊎个妹仔啊，轉去好哪！𠊎已經忒老，無可能再結婚了。就算𠊎還有一些仔希望，今暗晡就結婚，正經𫱔孻仔，

13你等愛等佢等長大成人係麼？你等敢能守得住，毋嫁人嗎？𠊎个妹仔啊，毋好恁樣，這係無可能个。因為上主刑罰𠊎，連累到你等，𠊎也盡傷心。」

14姖等又開聲大噭。娥珥巴唚家娘後就轉妹家去；總係路得還係毋拌得離開。

15拿娥美對姖講：「路得！若嫂已經轉去厥本族㧯姖所拜个神該位去了。你跈姖轉去好哪！」

16總係路得講：「請毋好喊𠊎離開你。莫喊𠊎轉去！你到㖠位，𠊎也到㖠位；你住㖠位，𠊎也住㖠位；你个民族就係𠊎个民族；你个上帝就係𠊎个上帝。

17你死在㖠位，𠊎也死在該位，埋葬在該位。除了死，絕對無麼介事能使𠊎㧯你分開！若係𠊎背約，願上主重重刑罰𠊎！」

18拿娥美看到路得恁決心愛跈自家去，就無再勸姖。

19恁樣，姖兩儕繼續共下行，直到伯利恆。姖等到伯利恆个時，全城个人就鬧起來。該兜婦人家著驚到喊講：「這斷真係拿娥美嗎？」

20拿娥美對姖等講：「毋好喊𠊎拿娥美，愛喊𠊎瑪拉。因為全能个上帝使𠊎命變當苦。

21𠊎出去个時富足，總係上主使𠊎空手轉來。做麼介還愛喊𠊎拿娥美呢？上主責罰𠊎；全能者使𠊎受苦。」

22這就係拿娥美㧯姖个摩押心舅路得對摩押轉來个經過。姖等轉到伯利恆，堵堵好係開始收割大麥个時節。

Jump to: Chapter 2 →