Ruth 3

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 2 Jump to: Chapter 4 →

1有一日，路得个家娘拿娥美對姖講：「𠊎个妹仔啊，𠊎一定愛為你尋安身个所在，俾你幸福。

2波阿斯敢毋係𫣆等个親族嗎？你識㧯佢个使女共下做事。聽𠊎講，今暗晡佢會在禾埕簸麥仔。

3你去洗身，搽一些仔香水，著最好个衫褲，然後到禾埕去。總係毋好俾佢知你在該位，愛等佢食飽、啉罅。

4愛注意佢睡个地方；佢睡掉，你就去，掀開佢腳項个被，睡在該位。佢會㧯你講應該做麼介。」

5路得應講：「你恁樣講，𠊎就照恁樣做。」

6所以，路得到禾埕去，照厥家娘㧯姖講个去做。

7波阿斯食飽、啉罅，心情當好，就去睡在麥堆堘。路得恬恬仔行過去，掀開佢腳項个被，睡在該位。

8到半夜，波阿斯忽然間醒過來，轉身看到有一個婦人家睡在佢腳塍，盡著驚，

9就問：「你係麼人？」姖講：「先生，𠊎係路得，你个使女。請你討𠊎，㧯𠊎結婚，因為你係𠊎个至親，有義務照顧𠊎！」

10波阿斯講：「細妹仔，願上主賜福給你！你以前對家娘忠心，這下你對老公个家族所表現个忠心還較大。你本來做得去尋一個後生人，不管佢有錢、無錢，總係你無恁樣做。

11細妹仔，這下毋使愁！你要求麼介，𠊎全部會為你辦好，因為𠊎本城个人全部知你係一個賢慧个婦人家。

12𠊎確實係你个至親，對你有義務，總係另外有一儕比𠊎還較親。

13今暗晡你就留在這位，天光朝晨，𠊎等看佢肯對你盡至親个義務麼。若係佢肯，就當好；若係佢毋肯，𠊎指等永生个上主發誓：𠊎一定會盡這個義務。這下你做得留在這位，睡到天光。」

14路得就睡在佢腳塍。總係天還吂光，人還認毋出姖个時，姖就䟘起來，因為波阿斯無愛給人知有婦人家來到禾埕。

15波阿斯對姖講：「脫下你袈等个衫，鋪在這位。」姖就照恁樣做。波阿斯就倒差毋多二十公斤个大麥在衫頂項，幫姖放在肩頭頂，然後轉城肚去。

16路得轉到屋下个時，家娘問姖：「𠊎个妹仔啊，樣般？」路得就將波阿斯為姖所做个全部㧯家娘講。

17路得又講：「佢給𠊎這二十公斤个大麥，因為佢㧯𠊎講：『做毋得空手轉到若家娘該位。』」

18拿娥美講：「𠊎个妹仔啊，毋使著急，看這件事樣般發展。波阿斯今晡日無辦好這事定著毋會歇睏。」

← Chapter 2 Jump to: Chapter 4 →