Song of Solomon 2

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 1 Jump to: Chapter 3 →

1𠊎係沙崙个玫瑰花，係山壢肚个百合花。

2𠊎个情妹在該兜細妹仔當中，就像竻藪肚个一蕊百合花。

3𠊎个情郎在男人當中，就像樹林肚个蘋果樹；𠊎歡喜坐在它个樹影下，它个果子當甜，合𠊎口味。

4佢帶𠊎入佢宴會个廳下，在𠊎頂高有愛情个旗仔。

5求你用葡萄乾來補𠊎个元氣，也用蘋果來恢復𠊎个精神，因為𠊎著到相思病噢！

6佢用左手托等𠊎个頭那，用右手揇等𠊎。

7耶路撒冷个細妹仔啊，請答應𠊎，請指等羚羊㧯鹿乸發誓；莫吵𠊎等，毋好㩢耍𠊎等，俾𠊎等个愛情自由發展。

8聽啊！𠊎情郎个聲！看啊！佢攀山過嶺向𠊎走來。

9𠊎个情郎像羚羊，像細鹿仔。佢企等，在𠊎屋下个壁後背；佢對窗門外背看入來，對窗格仔向底背偷看。

10𠊎个情郎㧯𠊎講話：䟘起來噢，𠊎个情妹啊！𠊎个美人，㧯𠊎共下來去噢！

11你看，寒冬已經過掉了；落雨个時節也過掉了。

12在野外百花已經盡開；鳥仔唱歌个時節到了，田野聽得到班鳩个聲。

13無花果開始熟了；葡萄樹也開花發出香味了。䟘起來噢，𠊎个情妹啊！𠊎个美人，㧯𠊎共下來去噢！

14𠊎个月鴿仔啊，你離𠊎恁遠，像在巖石个窿肚一樣；俾𠊎看你个面，俾𠊎聽你个聲；因為你个面盡靚，你个聲乜當好聽。

15愛捉狐狸，就係該兜毀壞葡萄園个細狐狸，因為𠊎个葡萄樹堵堵當開花！

16𠊎个情郎屬𠊎，𠊎也屬佢。佢在百合花當中掌羊仔，

17等到清早个涼風吹來，烏暗漸漸仔離開个時。𠊎个情郎啊，好轉去了，就像比特山頂个羚羊、抑係細鹿仔走等轉去。

← Chapter 1 Jump to: Chapter 3 →