Song of Solomon 4

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 3 Jump to: Chapter 5 →

1𠊎个情妹啊，你實在非常靚！你个目珠在面紗後背像月鴿仔恁溫柔。你个頭那毛像一群烏山羊，對基列山頂緊行等下來个樣。

2你个牙齒像正剪過毛个羊，全部洗到白淨白淨上來；它兜雙雙對對排等，一支牙齒都無缺掉。

3你个嘴唇像紅色个絲帶，開嘴講話个時盡得人惜。你兩片个面頰卵在面紗後背，紅潤到像分做兩析个石榴。

4你个頸筋像大衛个高塔，起到當堅固又非常高貴；你个頸筋所掛等个脖鍊，就像歸千隻勇士个盾牌。

5你个兩粒乳菇像一對細鹿仔，像雙生个羚羊在百合花當中食草。

6𠊎愛去沒藥山，到乳香岡頂高，等到清早个涼風吹來，烏暗漸漸仔離開个時。

7𠊎个情妹啊，你實在盡靚！你完全無一些缺點！

8𠊎个新娘啊，請㧯𠊎共下離開黎巴嫩山，㧯𠊎共下對黎巴嫩下來。請你遽遽對亞瑪拿个山頂，對示尼珥山㧯黑門山下來，就係獅仔㧯豹仔住个所在。

9𠊎个阿妹，𠊎个新娘啊，你个目珠一打眼拐，你頸筋个脖鍊一搖，𠊎个魂就被你鉤走了！

10𠊎个阿妹，𠊎个新娘啊，你个愛情實在盡甜。你个愛情比酒還較香；你膏油个香味贏過所有个香料。

11𠊎个新娘，你个嘴唇甜到像蜂糖；你个舌乸有蜂糖㧯乳个味道。你衫褲个香氣像黎巴嫩个香氣。

12𠊎个阿妹，𠊎个新娘，你像係鎖等个花園、圍等个井、封掉个泉源。

13園中果子樹盡多，有石榴樹結盡靚个果子；有鳳仙花、哪噠樹，

14有哪噠、番紅花、菖蒲、肉桂，㧯逐樣乳香木，還有沒藥、沉香，㧯各種高貴个香料。

15你係園中个泉水，係湧出个井水，係對黎巴嫩山流下來个溪水。

16北風啊，好醒了，南風啊，吹入𠊎个花園來，使空氣充滿香味。願𠊎个情郎入到佢个園中，食園肚最好个果子。

← Chapter 3 Jump to: Chapter 5 →