Song of Solomon 3

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 2 Jump to: Chapter 4 →

1𠊎暗晡頭睡在眠床頂，尋𠊎个愛人；𠊎尋佢，總係尋毋到。

2𠊎想：「𠊎愛䟘起來行透該城，穿過大街小巷，去尋𠊎个愛人。」𠊎尋佢，總係尋毋到。

3城肚該兜巡邏掌更个人堵到𠊎，𠊎就問：「你等有看到𠊎个愛人麼？」

4𠊎一離開佢等，就尋到佢。𠊎將佢拉等，毋肯放佢走，一直帶佢入吾姆个屋下，最尾入到𠊎出世个房間。

5耶路撒冷个細妹仔啊，請答應𠊎，請指等羚羊㧯鹿乸發誓；莫吵𠊎等，毋好㩢耍𠊎等，俾𠊎等个愛情自由發展。

6該對曠野上來，看像煙柱，用生理人賣个乳香㧯沒藥薰到香香个，係麼人呢？

7看哪，該係所羅門个轎仔，四圍有六十個士兵保護，係以色列最優秀个勇士。

8佢等全部當會使劍；佢等攏總當會相㓾。逐儕腰間佩帶利劍，防備暗晡頭个危險。

9所羅門王用黎巴嫩个樹仔，為自家製造轎仔。

10轎仔个柱仔用銀仔做个，轎底用金仔做个；坐墊用紫色个料仔做个，係耶路撒冷細妹仔用愛情織起來个。

11錫安个細妹仔啊，來看所羅門王！佢頭那戴等冠冕，係佢結婚該日，佢歡喜快樂該日，厥姆為佢戴个。

← Chapter 2 Jump to: Chapter 4 →