Titus 1

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

Jump to: Chapter 2 →

1𠊎係保羅，上帝个僕人，耶穌基督个使徒。𠊎蒙召㧯奉差派來幫助上帝个選民建立信仰，帶領佢等認識𠊎等个信仰所教个真理；

2這真理係用盼望永遠个生命做根據。上帝係毋會講花撩个！佢在萬世以前，已經應許愛將這永遠个生命賜給𠊎等，

3時機成熟个時，佢就通過傳福音將佢个真道顯明出來。𠊎受交託，奉𠊎等个救主上帝个命令，揹起傳這真道个任務。

4提多，𠊎這下寫信仔給你；你在𠊎等共同个信仰上係𠊎真个孻仔。願阿爸上帝㧯𠊎等个救主基督耶穌賜恩典、平安給你！

5𠊎留你在克里特，目的係愛你處理還吂辦好个事務，也愛你在逐個城市設立長老。𠊎識吩咐：

6做長老个一定愛係無好嫌个人。佢應當只有一個𡜵娘；佢个子女應該係信徒，無放蕩也無毋受管教个壞名聲。

7既然做教會个領袖擔負上帝个工作，佢就應該愛做無好嫌个人。佢莫固執，莫暴躁，莫酒醉，莫相打，莫貪財；

8愛樂意款待外鄉人，歡喜做好事，穩重，正直，聖潔，節制。

9愛堅守該可靠、符合真道个教訓；恁樣，正有辦法用健全个教訓來感化別人，並糾正該兜反對个人，指出佢等个毋著。

10因為有盡多人違悖真道，用無根無據个話欺騙人，特別係該兜主張愛接受割禮个猶太基督徒。

11你愛將該兜人个嘴塞等；佢等為到貪圖錢財，已經用毋應該傳講个學說破壞盡多人个家庭。

12在克里特人中間，有本地一個先知識恁樣講：「克里特人常常講花撩，係兇惡个禽獸，豺食又懶尸。」

13佢這個話無毋著。所以，你一定愛嚴嚴責備佢等，好俾佢等有健全个信仰，

14毋愛再聽猶太人該兜無影無跡个傳說，㧯該兜拒絕真理个人所堅持个規矩。

15對淨浰个人來講，一切攏總係淨浰个；總係對該兜垃圾㧯毋信个人來講，無一樣東西係淨浰个，因為佢等个心肝㧯天良全部垃圾到講毋得。

16佢等堅持講佢等認識上帝；總係佢等个行為否認佢。佢等係得人惱个人，係悖逆个人，無可能做出麼介好事來！

Jump to: Chapter 2 →