Titus 3

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 2 Jump to:

1你愛提醒大家，喊佢等愛服從執政者㧯掌權者，聽從命令，隨時隨地去行各種个好事。

2勸佢等莫講別人个壞話，莫相爭；做人愛和氣，用溫柔个態度來對待所有个人。

3𠊎等頭擺也係無智識、悖逆，㧯受迷惑；𠊎等識做各種情慾㧯享樂个奴僕，生活在惡毒㧯嫉妒个當中，彼此怨恨。

4總係，𠊎等个救主上帝已經顯出佢个慈愛，通過重生个洗禮㧯聖靈所賜个更新來拯救𠊎等；這毋係因為𠊎等自家有麼介好行為，係因為佢憐憫𠊎等。

6通過𠊎等个救主耶穌基督，上帝將聖靈豐豐富富倒在𠊎等个身上；

7對佢个恩典，上帝使𠊎等同佢有正確个關係，來得到所盼望該永遠个生命。

8這個話係確實有影个。𠊎希望你特別強調這兜事情，好使該兜信上帝个人熱心行善；行善係盡靚又對人有利益个事。

9愛避免戇檔个辯論，莫為族譜爭論，莫冤家抑係為法律个問題相爭；因為這兜全係無價值、無利益个。

10對製造紛爭个人，警告佢一兩擺，佢還係毋聽，就毋好再同佢來往。

11因為你知，這種人已經壞盡了，佢毋單淨犯罪，又定自家个罪。

12𠊎派亞提馬抑係推基古去你該位个時，你愛想盡辦法來尼哥坡里見𠊎，因為𠊎已經決定愛在該位過冬。

13愛盡量幫助西納律師㧯亞波羅出發去旅行，俾佢等無欠麼介。

14屬𠊎等个人愛學習認真做正當个工作，來供給生活个需要，免得做閒亍亍無路用个人。

15同𠊎共下个人攏總對你請安。請代𠊎等對該兜同信仰个好朋友請安。願上帝賜恩典給你等大家！

← Chapter 2 Jump to: