Titus 2

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 1 Jump to: Chapter 3 →

1論到你，你个教導定著愛合健全个教訓。

2你愛勸老人家，喊佢等做人愛穩重，有好德行，愛約束自家，愛追求健全个信心、愛心，㧯耐心。

3共樣，你也愛勸年長婦女，喊姖等做人愛謹慎，莫論人是非，莫做酒奴才。姖等愛做好榜樣，

4來教導後生个婦女，教姖等樣般惜老公㧯子女；

5訓練姖等樣般約束自家，過貞潔个生活，料理家務，有慈悲心，順從老公，免得上帝个道受譭謗。

6共樣，你也愛勸後生人，喊佢等愛約束自家。

7當然，你自家無論在㖠方面都愛有好行為，做人个模範。教人个時愛誠懇、穩重，

8所講个話愛妥當，毋好被人指責。恁樣，該兜好反對个人，因為尋毋到𠊎等个毋著，就無話好講，反轉自家感覺見笑。

9你愛勸做奴僕个，喊佢等愛服從主人，凡事俾主人歡喜，莫堵撐佢等，

10也做毋得偷拿佢等个東西；顛倒，愛在逐樣事上顯出忠心㧯有信用。恁樣，佢等所做个一切正會使𠊎等个救主上帝个教訓得到尊重。

11因為上帝拯救全人類个恩典已經顯明出來了。

12這恩典訓練𠊎等：愛棄絕無敬虔个生活㧯屬世个私慾；在今生愛用節制、正直，㧯敬虔來過日仔，

13來等候𠊎等所盼望蒙恩个日仔來到。該時，至大个上帝 — 𠊎等救主耶穌基督个榮耀愛顯現。

14基督為𠊎等犧牲自家，係愛救贖𠊎等脫離一切个邪惡，使𠊎等成做佢純潔个子民來歸屬佢，熱心來行善。

15你愛講論這兜事，好好運用你个權柄來勸勉人抑係責備人；毋好俾人看輕你。

← Chapter 1 Jump to: Chapter 3 →