bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Chinese
/
Chinese TTVH 2021 (現代台語譯本漢字版)
/
1 Kings 1
1 Kings 1
Chinese TTVH 2021 (現代台語譯本漢字版)
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 2 →
1
大闢 王年老歲數多，蓋被嘛蓋𣍐燒。
2
伊的人臣對伊講：「請阮的主阮的王准阮尋一個少年的在室女，來奉待照顧你，睏佇你的身軀邊，互阮的主阮的王得著溫暖。」
3
𪜶就佇 以色列 全國尋媠的查某囝仔；尋著 書念 一個女子，叫做 雅比莎 ，導來王遐。
4
此個查某囝仔真媠；伊奉待侍候王，毋拘王無及伊同房。
5
彼時， 大闢 及 哈及 生的子 亞多尼雅 想欲作大，講：「我欲作王。」伊為家己準備戰車及馬兵，閣有五十個兵佇伊頭前開路。
6
伊的老父毋曾給伊責備講：「你是按怎按呢做？」伊佇 押沙龍 尾後出世，生做不止英俊。
7
亞多尼雅 及 洗璐雅 的子 約押 ，閣及祭司 亞比亞他 參詳，𪜶就支持伊。
8
毋拘祭司 撒督 ，及 耶何耶大 的子 比拿雅 、先知 拿單 ，及 示每 、 利以 ，及 大闢 的勇士，攏無擁護 亞多尼雅 。
9
有一日， 亞多尼雅 佇 隱‧羅結 附近的 瑣希列 石磐遐，刣牛、羊，及肥的牲生獻祭，嘛請伊的眾兄弟，就是王的子，以及 猶大 所有王的人臣。
10
毋拘伊無請先知 拿單 、 比拿雅 ，及勇士，以及伊的小弟 所羅門 。
11
拿單 給 所羅門 的老母 拔示芭 講：「 哈及 的子 亞多尼雅 作王啦，你豈無聽著？咱的主 大闢 嘛毋知。
12
今你來，我替你拍算，通保全你及你的子 所羅門 的性命。
13
你入去見 大闢 王，對伊講：『我的主我的王啊，你豈毋是曾對你的女婢咒誓講，我的子 所羅門 欲續接你作王，欲坐你的位？是按怎 亞多尼雅 啲作王？』
14
你佇遐及王講話的時，我會隨你的後面入去，來證實你的話。」
15
拔示芭 入去房間見王；王真老， 書念 的女子 雅比莎 啲給伊侍候。
16
拔示芭 鞠躬拜王；王講：「你愛什麼？」
17
伊給王講：「我的主啊，你曾指上主 — 你的上帝對你的女婢咒誓講：『你的子 所羅門 欲續接我作王，伊欲坐我的位。』
18
今 亞多尼雅 已經自稱作王，我的主我的王你猶毋知。
19
伊有刣真多隻牛、羊，及肥的牲生獻祭，閣請王的眾子、祭司 亞比亞他 ，及元帥 約押 ；毋拘伊無請你的子 所羅門 。
20
我的主我的王啊， 以色列 人民的目睭攏啲看你，啲聽候你給𪜶宣布，什麼人欲續接我的主我的王坐王位。
21
若無，我的主我的王轉去你的列祖遐了後，我及我的子 所羅門 一定會互人看做叛徒。」
22
拔示芭 猶啲及王講話的時，先知 拿單 入來。
23
有人給王報告：「先知 拿單 佇遮。」 拿單 到王的面前，仆佇土腳拜王。
24
拿單 講：「我的主我的王，你豈曾講『 亞多尼雅 欲續接我作王，欲坐我的位』？
25
伊今仔日落去，刣真多牛、羊，及肥的牲生獻祭，閣請王的眾子，及諸個軍長，以及祭司 亞比亞他 。𪜶及 亞多尼雅 做夥飲食，講：『 亞多尼雅 王萬歲！』
26
毋拘伊無請我，嘛無請祭司 撒督 ，及 耶何耶大 的子 比拿雅 ，以及王的僕人 所羅門 。
27
這豈是我的主我的王的意思？王你猶毋曾對你的眾人臣宣布，什麼人欲續接我的主我的王坐你的位。」
28
大闢 王應講：「給我叫 拔示芭 來。」 拔示芭 就入來，佇王的面前徛啲。
29
王咒誓講：「我指救我的性命脫離一切患難，永活的上主講：
30
『我既然有指上主 — 以色列 的上帝對你咒誓，你的子 所羅門 欲續接我作王坐我的位，我今仔日一定欲照按呢做。』」
31
拔示芭 就鞠躬仆落去拜王，講：「願我的主 大闢 王萬萬歲！」
32
大闢 王閣講：「召祭司 撒督 、先知 拿單 ，及 耶何耶大 的子 比拿雅 來。」𪜶就攏來王的面前。
33
王給𪜶講：「著導宮廷的官長及恁去，互我的子 所羅門 騎我的騾落去 基訓 。
34
佇遐，祭司 撒督 及先知 拿單 著用油抹伊做 以色列 王。恁嘛著歕哨角宣布：『 所羅門 王萬歲！』
35
然後恁隨伊上來，互伊來坐我的位，續接我作王；我選立伊統治 以色列 及 猶大 。」
36
耶何耶大 的子 比拿雅 應王講：「阿們！願上主 — 我的主我的王的上帝嘛按呢宣布。
37
上主按怎及我的主我的王同在，願伊嘛按呢及 所羅門 同在，閣互伊的王權比我的主 大闢 王的王權閣較偉大。」
38
祭司 撒督 、先知 拿單 、 耶何耶大 的子 比拿雅 、 基利提 人及 比利提 人，就攏落去，互 所羅門 騎 大闢 王的騾，送伊到 基訓 。
39
祭司 撒督 就對會幕提貯油的角，用油抹 所羅門 ；𪜶就歕哨角，人民攏喝講：「 所羅門 王萬歲！」
40
人民隨伊上來，閣歕𥰔仔，非常歡喜，歡呼的聲大甲地強欲裂開。
41
亞多尼雅 以及及伊做夥的人客抵仔食桌煞，聽見歡呼的聲。 約押 聽著哨角的聲就問：「城內是按怎有嘩嘩哮的聲？」
42
伊猶啲講的時，祭司 亞比亞他 的子 約拿單 來。 亞多尼雅 給伊講：「入來，你是忠實的人，一定是欲報好消息。」
43
約拿單 應 亞多尼雅 講：「咱的主 大闢 王已經設立 所羅門 作王。
44
王派祭司 撒督 、先知 拿單 、 耶何耶大 的子 比拿雅 、 基利提 人及 比利提 人，及 所羅門 做夥去；𪜶互 所羅門 騎王的騾。
45
祭司 撒督 及先知 拿單 ，已經佇 基訓 給伊抹油互伊作王；𪜶攏對遐護送伊入城，歸城大聲歡呼；這就是恁所聽著的聲。
46
閣 所羅門 嘛已經坐王位。
47
王的人臣攏來給咱的主 大闢 王祝福，講：『願你的上帝互 所羅門 的名比你的名閣較尊貴，互伊的王權比你的王權閣較偉大。』王佇床裡俯落去敬拜，
48
祈禱講：『上主 — 以色列 的上帝應該受稱讚，因為伊有賞賜一個人今仔日坐我的位，互我親目看著。』」
49
所有及 亞多尼雅 做夥的人客攏驚甲皮皮惙，隨人逃走。
50
亞多尼雅 因為非常驚 所羅門 ，就去擒祭壇的角 。
51
有人給 所羅門 講：「 亞多尼雅 驚 所羅門 王，去擒佇祭壇的角，講：『求 所羅門 王今仔日對我咒誓，一定無欲用刀刣死伊的僕人。』」
52
所羅門 講：「伊若對我盡忠，連一支頭毛嘛𣍐落佇土腳；伊若作惡，一定著死。」
53
所羅門 王就差人對祭壇給伊導落來， 亞多尼雅 就來佇 所羅門 王面前跪拜。 所羅門 給伊講：「你倒去恁兜。」
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 2 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22